'గం గం గణేశా' తో దేవరకొండ యాక్షన్ షురూ..!

యువ హీరో ఆనంద్ దేవరకొండ హిట్టు ప్లాప్ లను పట్టించుకోకుండా వరుస సినిమాలను లైన్ లో పెడుతూ బిజీగా ఉన్నారు. హీరో విజయ్‌ దేవరకొండ సోదరుడిగా ఇండస్ట్రీలోకి ఎంట్రీ ఇచ్చినా.. తనకంటూ ఓ ప్రత్యేకత ఉండేలా కథలు ఎంపిక చేసుకుంటున్నారు. రెగ్యులర్‌ హీరో ఫార్మాట్‌ సినిమాలకు భిన్నంగా కంటెంట్ బేస్డ్ చిత్రాలతో ప్రేక్షకులను మెప్పిస్తూ వస్తున్నారు. ఈ క్రమంలో దేవరకొండ తాజాగా మరో కొత్త ప్రాజెక్ట్‌ ను మొదలు పెట్టారు.

ఆనంద్ దేవరకొండ రాబోయే చిత్రానికి ''గం. గం.. గణేశా'' అనే ఆసక్తికరమైన టైటిల్ ను ఖరారు చేసారు. దీనికి సంబంధించిన టైటిల్ పోస్టర్‌ ను మేకర్స్ కొద్దిసేపటి క్రితం ఆవిష్కరించారు. టైటిల్ బ్యాగ్రౌండ్ లో తుపాకుల ఫైరింగ్ ను చూడొచ్చు. యాక్షన్ ఫెస్టివల్ బిగిన్స్ అని పేర్కొనడాన్ని బట్టి చూస్తే.. ఈ సినిమా యాక్షన్ జోనర్ లో ఉండబోతుందని తెలుస్తోంది. అయినప్పటికీ ఇందులో కింగ్ సైజ్ ఎంటర్టైన్మెంట్ గ్యారంటీ అని చెబుతున్నారు.

''గం గం గణేశా'' చిత్రానికి ఉదయ్ శెట్టి దర్శకత్వం వహిస్తున్నారు. హై లైఫ్ ఎంటర్టైన్మెంట్ బ్యానర్ పై కేదార్ సెలగం శెట్టి - వంశీ కారుమంచి సంయుక్తంగా ఈ సినిమాని నిర్మిస్తున్నారు. చైతన్ భరద్వాజ్ సంగీతం సమకూరుస్తున్నారు. ఇందులో నటించే ఇతర ప్రధాన నటీనటులు మరియు సాంకేతిక నిపుణుల గురించి మరిన్ని వివరాలను త్వరలోనే వెల్లడించనున్నారు.

దేవరకొండ ఆనంద్ ప్రస్తుతం కేవీ గుహన్ దర్శకత్వంలో ‘హైవే’ అనే థ్రిల్లర్ సినిమా చేస్తున్నారు. అలానే 'హృదయ కాలేయం' ఫేమ్ సాయి రాజేష్ తో కలిసి ‘బేబీ’ అనే లవ్ అండ్ రొమాంటిక్ ఎంటర్టైనర్ లో నటిస్తున్నాడు. ఇక మధురా ఎంటర్టైన్మెంట్స్ - రోల్ కెమెరా విజువల్స్ సంస్థలు సంయుక్తంగా నిర్మిస్తున్న ఓ సినిమాకి ఆనంద్ కమిట్ అయ్యాడు. ఈ క్రమంలో ఇప్పుడు ''గం గం గణేశా'' అనే మూవీ షూటింగ్‌ ను ప్రారంభించబోతున్నారు.