గూగుల్ ప్ర‌శ్న‌ల‌కు దేవ‌ర‌కొండ బ్ర‌ద‌ర్స్ జ‌వాబులు

రౌడీ విజ‌య్ దేవ‌ర‌కొండ విల‌క్ష‌ణ ప్ర‌మోష‌న్స్ గురించి తెలిసిందే. అత‌డు త‌న సినిమాల‌కే కాదు తన సోద‌రుడు ఆనంద్ దేవ‌ర‌కొండ న‌టించిన సినిమాల‌కు అంతే వైవిధ్యంగా ప్ర‌చారం చేసేందుకు త‌న‌వంతు సాయం చేస్తున్నాడు. ఆనంద్ ని హీరోగా నిల‌బెట్టేందుకు దేవ‌ర‌కొండ వ‌రుస‌గా సొంత బ్యానర్ లో సినిమాల్ని నిర్మిస్తున్నారు. ఇప్ప‌టికే ఆనంద్ ని న‌టుడిగా ఓ మెట్టు ఎక్కించాడు.

ప్ర‌స్తుతం అత‌డు న‌టించిన `పుష్ప‌క విమానం` చిత్రం రిలీజ‌వుతున్న సంగ‌తి తెలిసిందే. తాజాగా దేవరకొండ బ్రదర్స్ ప్రమోషన్స్ మొదలు పెట్టేసారు. ఇందులో భాగంగా గూగుల్ ప్రశ్నలకు సమాధానాలు చెబుతూ ఉన్న‌ బ్ర‌ద‌ర్స్ వీడియో సోష‌ల్ మీడియాల్లో వైర‌ల్ గా మారింది. గూగుల్ లో ఎక్కువగా త‌మ గురించి సెర్చ్ చేసిన ప్రశ్నలకు బ్ర‌ద‌ర్స్ జ‌వాబులు చెప్పారు.

ఇంత‌కీ మీరు సింగిలేనా? అంటూ రౌడీ దేవ‌ర‌కొండ‌కు ఓ ప్ర‌శ్న గూగుల్ లో ఎదురైంది. దానికి అత‌డు ఇచ్చిన ఆన్స‌ర్ షాకిచ్చింది. అవును .. ఈమ‌ధ్యే నాకు బ్రేక‌ప్ అయ్యింది. ఆ బాధలోనే ఉన్నాను. ఎవ‌రికీ చెప్ప‌లేదు!! అంటూ ఆన్స‌ర్ చేయడంతో ఇంత‌కీ ఎవ‌రా అమ్మాయి? అంటూ ఆరాలు మొద‌ల‌య్యాయి.

ఇంత‌కీ విజ‌య్ కి నిజంగానే బ్రేక‌ప్ అయ్యిందా ? లేక త‌న లేడీ ఫ్యాన్స్ ని స‌ర‌దాగా అలా ఆట ప‌ట్టిస్తున్నాడా? అంటూ అంతా సందిగ్ధ‌త‌లో ఉన్నారు. ఎవ‌రా అమ్మాయి? అంటూ చాలా మంది ఆరాలు తీస్తున్నారు. అయితే దీనికి ఆన్స‌ర్ కూడా విజ‌య్ ఏదో ఒక సంద‌ర్భంలో చెబుతారేమో చూడాలి. మ‌రోవైపు లైగ‌ర్ చిత్రంలో న‌టిస్తున్న దేవ‌ర‌కొండ .. పాన్ ఇండియా స్టార్ గా త‌న‌ని తాను ఆవిష్క‌రించుకునేందుకు హార్డ్ వ‌ర్క్ చేస్తున్న సంగ‌తి తెలిసిందే. త‌న కెరీర్ ని చ‌క్క‌దిద్దుకుంటూనే త‌మ్ముడి కోసం అహ‌ర్నిశ‌లు శ్ర‌మిస్తున్న అన్న‌య్య‌గా అత‌డు చ‌రితార్థుడు అయ్యాడు.