జనతా గ్యారేజ్ లో దేవయాని కూడా..

యంగ్ టైగర్ ఎన్టీఆర్ - కొరటాల శివ కాంబినేషన్ లో ప్రారంభం కానున్న మూవీ జనతా గ్యారేజ్. నాన్నకు ప్రేమతో సక్సెస్ జోష్ లో ఎన్టీఆర్ - శ్రీమంతుడు సక్సెస్ కిక్ తో కొరటాల.. ఈ మూవీని ప్రతిష్టాత్మకంగా తెరకెక్కించబోతున్నారు. ఈ మూవీలో ఇతర నటీనటుల విషయంలోనూ చాలా జాగ్రత్తగా ఎంపిక చేస్తున్నారు. సీనియర్ నటి దేవయాని జనతా గ్యారేజ్ లో కీలకమైన పాత్రకు సైన్ చేశారు.

గతంలో పవన్ కళ్యాణ్ సరసన హీరోయిన్ కూడా అయిన ఈమె.. తెలుగులో చివరగా నటించిన సినిమా మహేష్ బాబు మూవీ నాని. ఈ సినిమాలో చిన్నారి అయిన ఎనిమిదేళ్ల మహేష్ పాత్రకు అమ్మగా నటించారు దేవయాని. ఆ తర్వాత ఇప్పటివరకూ తెలుగులో ఏ సినిమాని సైన్ చేయలేదు. ఇప్పుడు జనతా గ్యారేజ్ ను టాలీవుడ్ రీఎంట్రీ అనవచ్చు. జనతా గ్యారేజ్ లో మలయాళ సూపర్ స్టార్ మోహన్ లాల్ నటిస్తుండగా.. ఆయన భార్య పాత్రనే దేవయాని చేస్తుండడం విశేషం. వీరికి కొడుకుగా మరో మలయాళ నటుడు ఉన్ని ముకుందన్ నటించనున్నాడు.

సమంత - నిత్యామీనన్ లు హీరోయిన్ లుగా చేస్తున్న ఈ మూవీపై.. ఎన్టీఆర్ అభిమానులు చాలానే ఆశలు పెట్టుకున్నారు. రీసెంట్ గా నాన్నకు ప్రేమతో చిత్రంతో యాభై కోట్ల వసూళ్లు సాధించిన ఎన్టీఆర్.. కొరటాల మూవీతో పాత రికార్డులన్నీ తుడిచిపెట్టేయాలని కోరుకుంటున్నారు ఫ్యాన్స్. హైద్రాబాద్ సారధి స్టూడియోస్ లో వేసిన ఓ భారీ గ్యారేజ్ సెట్ లో.. జనతా గ్యారేజ్ షూటింగ్ ప్రారంభం కానుంది.