నాగ్ పుట్టిన రోజుకు గిఫ్ట్ రెడీ

నిన్ననే మెగాస్టార్ చిరంజీవి పుట్టిన రోజు వేడుకలు ఘనంగా జరిగాయి. ఈ సందర్భంగా ముందు రోజే ‘సైరా నరసింహారెడ్డి’ టీజర్ తో అభిమానులకు గొప్ప కానుక ఇచ్చింది చిత్ర బృందం. ఇంకో వారంలో మరో బడా స్టార్ పుట్టిన రోజు రాబోతోంది. చిరు తరంలో ఆయన తర్వాత అత్యంత క్రేజ్ సంపాదించుకున్న హీరోల్లో ఒకరైన అక్కినేని నాగార్జున పుట్టిన రోజు ఆగస్టు 29. ఈ సందర్భంగా అక్కినేని ఫ్యాన్స్ కూడా కానుక కోసం ఎదురు చూస్తున్నారు. వాళ్ల కోరికను ‘దేవదాస్’ టీం తీర్చబోతోంది.

నానితో కలిసి నాగార్జన నటిస్తున్న ఈ మల్టీస్టారర్ మూవీ ఫస్ట్ టీజర్ ఆగస్టు 29నే విడుదల కాబోతున్నట్లు సమాచారం. ఇప్పటికే ఈ చిత్ర ఫస్ట్ లుక్ లాంచ్ అయింది. మందు కొట్టి బెడ్డుమీద ఆదమరిచి నిద్రపోతున్న నాగ్-నాని ప్రేక్షకుల్లో సినిమాపై అంచనాల్ని పెంచేశారు. టీజర్ కూడా వైవిధ్యంగా.. చాలా వినోదాత్మకంగా ఉంటుందని అంటున్నారు. బాలీవుడ్ గ్రేట్ డైరెక్టర్ రాజ్ కుమార్ హిరాని సినిమాల తరహాలో ‘దేవదాస్’ ఉంటుందని నాగ్ ఇంతకుముందే వెల్లడించిన సంగతి తెలిసిందే.

‘భలే మంచి రోజు’.. ‘శమంతకమణి’ చిత్రాల దర్శకుడు శ్రీరామ్ ఆదిత్య రూపొందిస్తున్న ఈ చిత్రాన్ని సీనియర్ ప్రొడ్యూసర్ అశ్వినీదత్ నిర్మిస్తున్నారు. నాగ్ దేవ అనే డాన్ పాత్రలో కనిపించనుండగా.. నాని దాస్ అనే డాక్టర్ క్యారెక్టర్ చేస్తున్నాడు. ఆకాంక్ష సింగ్.. రష్మిక మందన్నా కథానాయికలుగా నటిస్తున్న ఈ చిత్రానికి మణిశర్మ సంగీతాన్నందిస్తున్నాడు. సెప్టెంబరు 27న ‘దేవదాస్’ ప్రేక్షకుల ముందుకు రానుంది.