వర్మ మార్కు ‘దేవినేని నెహ్రూ’ ఇదిగో..

ఎలాంటి నటుడైనా సరే.. వర్మ చేతిలో పడ్డాక సరికొత్తగా తయారవుతాడు. మామూలుగా కనిపించే వ్యక్తుల్ని కూడా తన పాత్రలకు తగ్గట్లు మలుచుకోవడంలో వర్మ దిట్ట. ఇలా తన సినిమాల ద్వారా చాలామందికి మేకోవర్ ఇచ్చాడు వర్మ. తాజాగా ‘వంగవీటి’ సినిమా కోసం చాలామందిని తన పాత్రలకు తగ్గట్లుగా అద్భుతంగా మలిచినట్లున్నాడు వర్మ. వంగవీటి.. ఆయన భార్య పాత్రల్లో నటీనటుల్ని ఇప్పటికే ట్రైలర్లో చూశాం. ఇప్పుడు సినిమాలో కీలకమైన దేవినేని నెహ్రూ పాత్రలో నటించిన ఆర్టిస్టుని వర్మ పరిచయం చేశాడు. అతడి పేరు.. శ్రీతేజ్. ముంబయి నుంచి ఈ నటుడిని పట్టుకొచ్చినట్లున్నాడు వర్మ.

దేవినేని నెహ్రూ ఫొటోను.. శ్రీతేజ్ ఫొటోను మామూలుగా పెట్టి చూస్తే పోలికలు పెద్దగా కనిపించవేమో కానీ.. వర్మ మేకోవర్ తర్వాత మాత్రం అచ్చం దేవినేని లాగే కనిపిస్తున్నాడు శ్రీతేజ్. పైగా దేవినేని తరహాలో అతడిచ్చిన ఎక్స్ ప్రెషన్ చూస్తే షాకవ్వాల్సిందే. కొన్ని నెలల పాటు దేవినేని నెహ్రూ హావభావాల్ని.. బాడీ లాంగ్వేజ్ ను స్టడీ చేసి శ్రీతేజ్ ఆ తర్వాతే ఈ పాత్ర చేశాడని చెబుతున్నాడు వర్మ. నెహ్రూ పాత్రలో అద్భుతమైన పెర్ఫామెన్స్ ఇచ్చినట్లు కూడా చెప్పాడు. ‘వంగవీటి’ విడుదలకు సమయం దగ్గర పడుతుండగా.. వివాదాస్పద నేత అయిన దేవినేని నెహ్రూ పాత్రను పరిచయం చేయడంతో సినిమాపై ఆసక్తి మరింత పెరుగుతోంది. ఈ నెల 23నే ‘వంగవీటి’ ప్రేక్షకుల ముందుకు రానున్న సంగతి తెలిసిందే.

Like Us on Facebook : https://www.facebook.com/Tupakidotcom/