దేవిశ్రీ... నీకు నువ్వే సాటి

ఎంతైనా దేవిశ్రీ ప్రసాద్ దేవిశ్రీ ప్రసాదే.. అతడి సంగీత దర్శకత్వంలో ఆడియో విడుదలైనపుడల్లా వినిపించే మాట ఇది. ‘నాన్నకు ప్రేమతో’ ఆడియో విన్నాక కూడా జనాలు ఇలాగే ఫీలవుతున్నారు. సంక్రాంతికి రాబోతున్న నాలుగు సినిమాల ఆడియోలూ కొన్ని రోజుల వ్యవధిలో విడుదలయ్యాయి. వీటిలో బెస్ట్ ఆడియో ఏదంటూ.. వెబ్ సైట్లలో, ట్విట్టర్లో పోల్స్ పెడుతున్నారు జనాలు. మరో మాట లేకుండా ‘నాన్నకు ప్రేమతో’కే ఓట్లు గుద్దేస్తున్నారు మ్యూజిక్ లవర్స్. నాలుగింట మూడొంతుల ఓట్లు ‘నాన్నకు ప్రేమతో’కే పడుతున్నాయి. మిగతా మూడు సినిమాలు కలిసి మిగతా 25 శాతం ఓట్లు పంచుకుంటున్నాయి. దాదాపుగా ప్రతి పోల్ లోనూ ఇలాంటి ఫలితాలే వస్తున్నాయి. దీన్ని బట్టే ‘నాన్నకు ప్రేమతో’ ఆడియో ఎంత పెద్ద హిట్టో అర్థం చేసుకోవచ్చు.

దేవిశ్రీ లిరిక్స్ తో ఎన్టీఆర్ పాడిన ‘ఐ వానా ఫాలో ఫాలో’ అయితేనేం.. రఘు దీక్షిత్ తన టిపికల్ వాయిస్ తో హై పిచ్ లో పాడిన ‘డోంట్ స్టార్ టిల్ యు గెట్ ఎనఫ్’ అయితేనేం.. దేవిశ్రీ స్వయంగా పాడిన ‘నీ మనసు నాలో’ అయితేనేం.. ఇంకా లవ్ మి ఎగైన్ - లవ్ దెబ్బ పాటలైతేనేం.. అన్నీ కూడా జనాలకు వెంటనే ఎక్కేశాయి. ఎక్కడ చూసినా ఆ పాటలే మార్మోగిపోతున్నాయి. దేవిశ్రీ మార్కు బీట్ ఉన్న పాటలు జనాలకు బాగా నచ్చేస్తున్నాయి. లిరిక్స్ కూడా సరదాగా, అర్థవంతంగా ఉండటం ఆడియోకు పెద్ద ప్లస్ అయింది. యూట్యూబ్ జ్యూక్ బాక్స్ లో, మ్యూజిక్ వెబ్ సైట్లలో, ఎఫ్ ఎం రేడియో స్టేషన్లలో.. ఇలా ఎక్కడ చూసినా ‘నాన్నకు ప్రేమతో’ పాటలు తెగ ప్లే అయిపోతున్నాయి. ఇక డౌన్ లోడ్ల సంగతి సరే సరి. మొత్తానికి దేవిశ్రీ మ్యూజిక్ అందిస్తే ఆ సినిమాకు తిరుగుండదని మరోసారి రుజువైంది.