డీఎస్పీ కొత్త అర్థం చెప్పాడుగా!

ప్ర‌స్తుత తెలుగు సినిమా గురించి కాసింత అవ‌గాహ‌న ఉన్న‌వాళ్లు కూడా డీఎస్పీ అంటే ఏంటో ఇట్టే చెబుతారు. దేవిశ్రీప్ర‌సాద్ ఆ రేంజ్‌ లో గుర్తింపు తెచ్చుకొన్నాడు. త‌మిళంలోనూ ఆయ‌న పేరు మార్మోగిపోతుంటుంది. అయితే డీఎస్పీ అంటే దేవిశ్రీప్ర‌సాద్ అనే కాదు, దానికి మ‌రో కొత్త అర్థం కూడా చెప్పాడు దేవి. డి అంటే డ్యాన్సర్ - ఎస్ అంటే సింగర్ - పి అంటే పెర్ఫార్మర్ అని! ఆ కొత్త అర్థానికి త‌గ్గ‌ట్టుగానే దేవిశ్రీప్ర‌సాద్ డ్యాన్సుల‌తోనూ, పాటలతోనూ అద్భుత‌మైన ప్ర‌ద‌ర్శ‌న‌లు ఇస్తుంటాడు. విదేశాల్లో సైతం దేవి షో అంటే కుర్ర‌కారు ఊగిపోతుంటారు. ఇప్పుడు ఆ సంద‌డిని బుల్లితెర‌కి షిప్ట్ చేశాడు. త్వ‌ర‌లోనే జీ తెలుగులో ఓ మ్యూజిక‌ల్ ప్రోగ్రామ్ చేయ‌బోతున్నాడు.

ఆ విష‌యాన్ని స్వ‌యంగా ట్విట్ట‌ర్ ద్వారా వెల్ల‌డించాడు దేవి. ఆయ‌న ట్విట్ట‌ర్‌ లో త్వ‌ర‌లోనే ఓ స‌ర్‌ప్రైజింగ్ న్యూస్ చెప్ప‌బోతున్నా అనేస‌రికి అంద‌రూ ఆస‌క్తిగా ఎంగేజ్ అయిపోయారు. దేవి అస‌లు ఏం చెబుతాడా? తాను క‌థానాయ‌కుడిగా చేయ‌నున్న కొత్త సినిమా వివ‌రాల్ని బ‌య‌ట‌పెడ‌తాడా? లేక ఇంకోటా ఇంకోటా? అంటూ ఆరా తీశారు. అయితే జీ తెలుగులో మ్యూజికల్ ప్రోగ్రామ్ చేయ‌బోతున్నాన‌ని ఆ త‌ర్వాత ఓ వీడియో రూపంలో స్ప‌ష్టం చేశాడు. అందులోనే త‌న పేరుకి కొత్త అర్థాన్ని చెప్పాడు. సో... బుల్లితెర ప్రేక్షకులారా... దేవిశ్రీ ప్ర‌సాద్ మ్యూజిక్ షోని ఎంజాయ్‌ చేయ‌డానికి సిద్ధ‌మైపోండిక‌!