దేవిశ్రీ రాత.. ఎన్టీఆర్ పాట

దేవిశ్రీ ప్రసాద్-ఎన్టీఆర్.. ఈ కాంబినేషన్లో వచ్చిన గత రెండు సినిమాలూ పెద్ద మ్యూజికల్ హిట్లే. ఇప్పుడు ఈ ఇద్దరూ హ్యాట్రిక్‌ కు రెడీ అయిపోయారు. ‘నాన్నకు ప్రేమతో’ ఆడియో మీద అంచనాలు భారీగానే ఉన్నాయి. ఇప్పటికే టీజర్లో వినిపించిన ‘ఐ వానా ఫాలో ఫాలో’ సాంగ్ జనాలకు విపరీతంగా నచ్చేసింది. దీని ఫుల్ సాంగ్ ఎలా ఉంటుంది.. మిగతా పాటలు ఎలా ఉంటాయి అని ఆసక్తిగా ఎదురు చూస్తున్నారు నందమూరి ఫ్యాన్స్. ఆదివారం ఆడియో విడుదల కానుండగా.. రెండు రోజుల ముందే ఆడియో ట్రాక్ లిస్ట్ రిలీజ్ చేశాడు. సినిమాలో మొత్తం ఐదు పాటలున్నాయి.

ఇందులో ఐ వానా ఫాలో ఫాలో పాటను ఎన్టీఆర్ పాడగా.. దీనికి లిరిక్స్ దేవిశ్రీనే అందించడం విశేషం. మిగతా నాలుగు పాటల్లో మూడు చంద్రబోస్ రాశాడు. డోంట్ స్టాప్, లవ్ మి అగైన్, లవ్ దెబ్బ.. అనే మూడు పాటలకు బోస్ సాహిత్యాన్నందించాడు. శ్రీమంతుడు - సన్నాఫ్ సత్యమూర్తి సినిమాల్లో అదిరిపోయే పాటలు పాడిన రఘు దీక్షిత్.. డోంట్ స్టాప్ అనే పాటకు కూడా గొంతిచ్చాడు. లవ్ మి అగైన్ పాటను సూరజ్ సంతోష్.. లవ్ దెబ్బ సాంగ్ దీపక్, శ్రావణ భార్గవి ఆలపించారు. ఆడియోలో భాస్కరభట్ల కూడా ఓ పాట రాశాడు. నా మనసు నీలో.. అనే పల్లవితో సాగే ఈ పాటను దేవిశ్రీ ప్రసాద్ షర్మిళతో కలిసి పాడాడు.