దేవిశ్రీ ప్రసాద్ దర్శకత్వంలో సుకుమార్!

సుకుమార్ దర్శకత్వంలో దేవిశ్రీ ప్రసాద్ అని రాయబోయే.. పొరబాటున రివర్సులో హెడ్డింగ్ పెట్టామని అనుకుంటున్నారా? అలా అయితే పొరబడ్డట్లే. ఈ హెడ్డింగ్‌లో ఉన్నది నిజ్జంగా నిజం. దేవిశ్రీ ప్రసాద్ దర్శకత్వంలో సుకుమార్ నిజంగానే నటించాడు. ఐతే అది సినిమా కాదు. జస్ట్ ఒక ప్రోమో వీడియో. దేవిశ్రీ ప్రసాద్ కేవలం సినిమాలకు సంగీతం అందించడమే కాదు.. సంగీత కచేరీలు కూడా చేస్తుంటాడు. ఇందుకోసం ప్రపంచ యాత్రలు చేస్తుంటాడు. అతను వచ్చే నెలలో అమెరికాలో మ్యూజికల్ కన్సర్ట్ చేయబోతున్నాడు. దానికి సంబంధించి ప్రోమో వీడియో రెడీ చేశాడు. ఇందులో సుకుమార్ నటించాడట. దీనికి దేవిశ్రీ దర్శకత్వం వహించాడట.

మరో విశేషం ఏంటంటే ఈ వీడియోను శనివారం సాయంత్రం 7 గంటలకు సమంత లాంచ్ చేయబోతోంది. మరి ఈ ప్రోమో వీడియోలో ఏం విశేషం ఉందో.. సుకుమార్‌ను పెట్టి ప్రోమో కట్ చేసి దేవి ఏం సంకేతాలు ఇచ్చాడో చూడాలి. ఆగస్టు 11 నుంచి సెప్టెంబరు 16 వరకు అమెరికాలోని ఆరు నగరాల్లో ఈ కన్సర్ట్ నిర్వహించబోతుండటం విశేషం. దేవిశ్రీ ట్రూప్‌లో పలువురు సింగర్లు, మ్యుజీషియన్లు ఈ టూర్లో పాల్గొనబోతున్నారు. దేవి కెరీర్లోనే అతి పెద్ద కన్సర్ట్స్‌‌లో ఇదొకటట. ఒకవైపు సంగీత దర్శకుడిగా భారీ సినిమాలు చేస్తూ తీరిక లేకుండా గడుపుతూనే ఇలా భారీ కన్సర్ట్స్ చేయడం దేవిశ్రీకే చెల్లింది. అతడి ఎనర్జీకి హ్యాట్సాఫ్ చెప్పాల్సిందే.