‘క్లాస్’ సినిమాకు ‘మాస్’ పంచ్

ఈసారి క్రిస్మస్ వీకెండ్లో నాలుగు సినిమాలు రిలీజయ్యాయి. అందులో తమిళ డబ్బింగ్ సినిమాలైన లాఠీ, కనెక్ట్ తొలి రోజే చతికిలపడ్డాయి. వీకెండ్లోనే వాటి కథ ముగిసిపోయింది. ఇక ఈ పండక్కి రిలీజైన మిగతా రెండు చిత్రాలు ‘ధమాకా’, ‘18 పేజెస్’ ఫుల్ పాజిటివ్ టాక్ ఏమీ తెచ్చుకోలేదు. అలా అని టాక్ మరీ బ్యాడ్‌గానూ లేదు. క్రిస్మస్ వీకెండ్ సినిమాలు అన్నింట్లోనే మెరుగైన టాక్ వచ్చింది ‘18 పేజెస్’కే అని చెప్పాలి.

ఈ సినిమాలో క్రైమ్ ఎలిమెంట్ అంత ఆసక్తికరంగా సాగకపోయినా.. ప్రేమకథ విషయంలో ప్రేక్షకులు సంతృప్తి చెందారు. మౌత్ టాక్‌కు తోడు రివ్యూలు కూడా పాజిటివ్‌గానే రావడం.. మరోవైపు ‘ధమాకా’ రొటీన్ మాస్ సినిమా అంటూ చాలామంది పెదవి విరచడంతో క్రిస్మస్ విన్నర్ ‘18 పేజెస్’యే అవుతుందనే అనుకున్నారు. కానీ అనూహ్యంగా ‘ధమాకా’ తొలి రోజు నుంచి అదిరిపోయే వసూళ్లతో సాగిపోయింది.

తొలి రోజు ఊపు తర్వాతి రోజు ఉండదేమో అనుకుంటే.. శని, ఆదివారాల్లో కూడా ‘ధమాకా’ బాక్సాఫీస్ దగ్గర పూర్తి ఆధిపత్యం చలాయించింది. వసూళ్లు అంచనాలను మించిపోయాయి. వీకెండ్ గ్రాస్ రూ.25 కోట్లు దాటినట్లు తెలుస్తోంది. టాక్, రివ్యూలకు భిన్నంగా ఈ సినిమా ఈ స్థాయిలో వసూళ్లు రాబట్టడం ఆశ్చర్యం కలిగించే విషయమే.

క్రిస్మస్ సెలవుల్లో ప్రేక్షకులు ఏదో ఒక సినిమా చూడాల్సిందే అని ఫిక్సయి.. ఫస్ట్ ఛాయిస్‌గా ‘ధమాకా’నే ప్రిఫర్ చేసినట్లున్నారు. ఈ సినిమాకే అగ్ర తాంబూళం దక్కడంతో ‘18 పేజెస్’ ఆశించిన స్థాయిలో వసూళ్లు రాబట్టలేకపోయింది. వీకెండ్ మొత్తంలో ఈ సినిమా గ్రాస్ రూ.7 కోట్లకు అటు ఇటు ఉందంతే. ఆదివారం కొంచెం మెరుగ్గానే వసూళ్లు వచ్చినప్పటికీ ఓవరాల్‌గా ఫస్ట్ వీకెండ్లో సినిమా అండర్ పెర్ఫామ్ చేసింది. ‘కార్తికేయ-2’ లాంటి బ్లాక్ బస్టర్ తర్వాత నిఖిల్-అనుపమ జంటగా నటించిన సినిమా కావడం, సినిమాకు పాజిటివ్ టాక్ కూడా రావడంతో ఇంకా మెరుగైన వసూళ్లు ఆశించిన చిత్ర బృందానికి నిరాశ తప్పట్లేదు.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.