డబుల్‌ హ్యాట్రిక్‌ ఖాయమనిపిస్తోంది

తమిళ స్టార్‌ హీరో ధనుష్‌ కెరీర్‌ లో 'పొల్లాదవన్‌' - 'ఆడుగళం' - 'వడ చెన్నై' చిత్రాలు ప్రత్యేక స్థానంను కలిగి ఉంటాయి. ఈమూడు సినిమాలు కూడా చాలా విభిన్నంగా ఉంటూ ధనుష్‌ మూడు విభిన్నమైన గెటప్స్‌ లో కనిపించాడు. ఈ మూడు సినిమాలకు కూడా వెట్రిమారన్‌ దర్శకత్వం వహించిన విషయం తెల్సిందే. ధనుష్‌ - వెట్రిమారన్‌ ల కాంబినేషన్‌ లో రూపొందిన ఈ మూడు సినిమాలు వరుసగా సక్సెస్‌ లు దక్కించుకుని హ్యాట్రిక్‌ గా నిలిచాయి. ఈ కాంబో హ్యాట్రిక్‌ సక్సెస్‌ ల తర్వాత ప్రస్తుతం 'అసుర' అనే చిత్రం కోసం మళ్లీ కలిశారు. ఈ చిత్రం కూడా వీరిద్దరి కాంబోకు మరో సక్సెస్‌ ను తెచ్చి పెట్టడం ఖాయం అంటూ ఫస్ట్‌ లుక్‌ పోస్టర్‌ చూస్తేనే అనిపిస్తోంది.

నేడు షూటింగ్‌ ప్రారంభం అవుతున్న సందర్బంగా రెండు పోస్టర్స్‌ ను చిత్ర యూనిట్‌ సభ్యులు విడుదల చేశారు. అందులో మొదటి పోస్టర్‌ లో ధనుష్‌ బల్లెం పట్టుకుని ఆవేశంగా - రఫ్‌ లుక్‌ తో శత్రువులపైకి దూకుతున్నాడు. ధనుష్‌ గెటప్‌ చూస్తుంటే పల్లెటూరు నేపథ్యంలో సినిమా ఉంటుందనిపిస్తుంది. ఇక రెండవ పోస్టర్‌ కూడా చాలా విభిన్నంగా ఉంది. మంజు వారియర్‌ తో ధనుష్‌ ఒక స్టూడియోలో ఫొటోకు ఫోజ్‌ ఇచ్చే పోస్టర్‌ సినిమాపై అంచనాలను పెంచేస్తున్నాయి. ధనుష్‌ కంటే సినిమాల్లో సీనియర్‌ - వయసులో కూడా సీనియర్‌ అయిన మంజు వారియర్‌ ను ఈ చిత్రంలో హీరోయిన్‌ గా ఎంపిక చేయడం చర్చనీయాంశం అవుతోంది.

ధనుష్‌ పక్కన మంజు వారియర్‌ హీరోయిన్‌ ఏంటంటూ ప్రశ్నించిన వారంతా కూడా ఇప్పుడు ఫస్ట్‌ లుక్‌ పోస్టర్‌ చూసిన తర్వాత నోరెళ్ల బెడుతూ సినిమా సక్సెస్‌ అవ్వడం ఖాయం అంటున్నారు. 'అసురన్‌' చిత్రం ధనుష్‌ కెరీర్‌ లో మరో నిలిచి పోయే సినిమా అవుతుందని చిత్ర యూనిట్‌ సభ్యులు నమ్మకంగా చెబుతున్నారు. సినిమా ప్రకటనతోనే అంచనాలు పెరిగి పోయాయి - ఇప్పుడు ఫస్ట్‌ లుక్‌ పోస్టర్స్‌ విడుదల తర్వాత అసుర అంచనాలు పీక్స్‌ కు వెళ్లాయి.