ఫస్ట్ లుక్: అన్న కోసం హంటర్ గా మారిన ధనుష్..!

కోలీవుడ్ స్టార్ హీరో ధనుష్ వరుస సినిమాలతో బిజీగా ఉన్నారు. ఒక సినిమా షూటింగ్ లో ఉండగానే మరో చిత్రాన్ని సెట్స్ మీదకు తీసుకెళ్లే ధనుష్.. ఈ ఏడాది 'కర్ణన్' 'జగమే తంత్రం' చిత్రాలను రిలీజ్ చేశారు. ధనుష్ చేతిలో ప్రస్తుతం అర డజను కు పైగా ప్రాజెక్ట్స్ ఉన్నాయి. వాటిలో తన సోదరుడు, స్టార్ డైరెక్టర్ సెల్వ రాఘవన్ తో చేస్తున్న ''నానే వరువేన్'' సినిమా కూడా ఉంది. ఇప్పటికే విడుదలైన ఈ సినిమా అనౌన్స్ మెంట్ పోస్టర్ ఆకట్టుకుంది.

తాజాగా ''నానే వరువేన్'' చిత్రాన్ని సెట్స్ మీదకు తీసుకెళ్లారు. ఈరోజు శ‌నివారం నుంచి సినిమా రెగ్యుల‌ర్ షూటింగ్ ప్రారంభం అయిందని మేకర్స్ తెలియజేసారు. ఈ సందర్భంగా ధనుష్ ఫస్ట్ లుక్ ని రిలీజ్ చేశారు. ఇందులో ధనుష్ లెదర్ జాకెట్ - తల పై టోపీ పెట్టుకొని కౌ బౌయ్ లుక్ లో కనిపిస్తున్నాడు. అంతేకాదు నోట్లో సిగార్ భుజాన ఓ ఆయుధం పట్టుకొని వేటకు సిద్ధమైన హంటర్ లా ఉన్నాడు.

ఈ యాక్షన్ థ్రిల్లర్ లో ధనుష్ ద్విపాత్రాభినయం చేస్తారని.. తొలిసారి అటు హీరోగానూ ఇటు విల‌న్‌ గానూ న‌టించ‌బోతున్నాడ‌ని కోలీవుడ్ వ‌ర్గాలు చెబుతున్నాయి. '7/G బృందావన కాలనీ' 'ఆడవారి మాటలకు అర్థాలే వేరులే' వంటి సినిమాలతో తెలుగు ప్రేక్షకులను అలరించిన సెల్వ రాఘవన్.. దాదాపు దశాబ్దం తర్వాత తన తమ్ముడితో చేస్తున్న సినిమా ''నానే వరువేన్'. ఇందులో ధనుష్ పాత్రను వైవిధ్యంగా తీర్చిదిద్దుతున్నారని తెలుస్తోంది.

'నానే వరువేన్' చిత్రాన్ని వి క్రియేషన్స్ బ్యానర్ మీద కలైపులి ఎస్. థాను నిర్మిస్తున్నారు. ఇందులో ధనుష్ సరసన హీరోయిన్ గా ఇందుజా రవిచంద్రన్ ని ఎంపిక చేశారని సమాచారం. యువన్ శంకర్ రాజా ఈ చిత్రానికి సంగీతం సమకూరుస్తున్నారు. ఇక సెల్వ రాఘవన్ దర్శకత్వంలో ధనుష్ 'యుగానికొక్కడు 2' సినిమా కూడా చేయాల్సి ఉంది. ప్రీ ప్రొడక్షన్ కోసం ఎక్కువ సమయం తీసుకుంటున్న ఈ చిత్రాన్ని 2024 లో ప్రేక్షకుల ముందుకు తీసుకొస్తారు.

ఇకపోతే డబ్బింగ్ సినిమాలతో తెలుగు ప్రేక్షకులను అలరించిన ధనుష్.. స్ట్రెయిట్ తెలుగు మూవీతో టాలీవుడ్ లో అడుగుపెడుతున్నాడు. సెన్సిబుల్ డైరెక్టర్ శేఖర్ కమ్ముల తో వర్సటైల్ హీరో ఓ థ్రిల్లర్ మూవీ కమిట్ అయ్యారు. ఇది భారీ స్థాయిలో రూపొందే మల్టీలాంగ్వేజ్ మూవీ. ఏషియన్ సోనాలి నారంగ్ సమర్పణలో శ్రీ వెంకటేశ్వర సినిమాస్‌ బ్యానర్‌ పై నారాయణ్‌ దాస్‌ నారంగ్‌ - పి.రామ్మోహన్‌ రావు ఈ చిత్రాన్ని నిర్మించనున్నారు.

ధనుష్ ఇప్పటికే బాలీవుడ్ లో 'అత్రాంగి రే'.. హాలీవుడ్ లో 'ది గ్రే మ్యాన్' సినిమాల షూటింగ్స్ పూర్తి చేశారు. అలానే కార్తీక్ నరేన్ దర్శకత్వంలో ధనుష్ నటిస్తున్న 'మారన్' సినిమా ప్రస్తుతం పోస్ట్ ప్రొడక్షన్ వర్క్స్ జరుపుకుంటోంది. అలానే మిత్రన్ కె జవహర్ డైరెక్షన్ లో చేస్తున్న 'తిరుచిత్రంబలం' చిత్రీకరణ దశలో ఉంది. ఇదే క్రమంలో శేఖర్ కమ్ముల చిత్రాన్ని మొదలు పెట్టనున్నారు.

ఇక 'కర్ణన్' ఫేమ్ మారి సెల్వరాజ్ తో ధనుష్ మరో సినిమా చేయనున్నట్లు ఇటీవలే ప్రకటించారు. అలానే 'మిస్టర్ మజ్ను' ఫేమ్ వెంకీ అట్లూరి తో ఓ సినిమా ఉంటుందని.. సితార ఎంటర్టైన్మెంట్స్ బ్యానర్ లో రూపొందుతుందని టాక్ వినిపిస్తోంది. దీనిపై స్పష్టత రావాల్సి ఉంది. ఏదేమైనా ఏ సినిమా ఎప్పుడు వస్తుందో తెలియనప్పటికీ.. ధనుష్ మాత్రం గ్యాప్ లేకుండా వరుసగా మూవీస్ చేయాలని డిసైడ్ అయినట్లు అతని లైనప్ చూస్తే అర్థం అవుతుంది.