సూప‌ర్ స్టార్ ఫ్యామిలీకి మ‌రో గ్రేట్ న్యూస్‌

హాలీవుడ్ సినిమాల్ని ఫాలో అయ్యేవారికి ఉమా తుర్మ‌న్ గురించి ప‌రిచ‌యం చేయాల్సిన ప‌ని లేదు. ప్ర‌పంచ ప్ర‌ఖ్యాతి చెందిన హాలీవుడ్ తార ఆమె. అలాంటి గ్రేట్ హీరోయిన్‌ తో త‌మిళ స్టార్ హీరో ధ‌నుష్ జ‌ట్టు క‌ట్ట‌బోతున్నాడు. ఇప్ప‌టికే బాలీవుడ్లోనూ త‌న‌కంటూ ఓ పేరు సంపాదించుకున్న ధ‌నుష్ త్వ‌ర‌లోనే ఓ సెన్సేష‌న‌ల్ మూవీతో అత‌ను హాలీవుడ్ అరంగేట్రం చేయ‌బోతున్నాడు. అత‌ను హీరోగా న‌టించే హాలీవుడ్ మూవీలో ఉమా తుర్మ‌న్ ముఖ్య పాత్ర పోషించ‌బోతోంది. ఏడాదిగా ధ‌నుష్ హాలీవుడ్ రంగ‌ప్ర‌వేశం గురించి జ‌రుగుతున్న చ‌ర్చ‌లు కొలిక్కి వ‌చ్చి ఎట్ట‌కేల‌కు ఆ ప్రాజెక్టు గురించి అనౌన్స్‌మెంట్ కూడా వ‌చ్చేసింది.

‘ది ఎక్స్‌ట్రార్డిన‌రీ జ‌ర్నీ ఆఫ్ ద ఫాకిర్ హు గాట్ ట్రాప్డ్ ఇన్ య‌న్ ఇకియా క‌ప్ బోర్డ్’.. ఇదీ ధ‌నుష్ న‌టించ‌బోయే సినిమా టైటిల్. ప్ర‌ముఖ ఇరానియ‌న్-ఫ్రెంచ్ ఫిలిం మేక‌ర్ మార్జాన్ స‌త్రాపి ఈ చిత్రానికి ద‌ర్శ‌కుడు కావ‌డం విశేషం. ధ‌నుష్ త‌మిళంలో ‘మ‌రియ‌న్’ అనే సినిమా చేసిన సంగ‌తి తెలిసిందే. అందులో అత‌డి పెర్ఫామెన్స్ చూసి హాలీవుడ్ సినిమాకు ఎంచుకున్నార‌ట‌. ఈ మూవీ కూడా ‘మ‌రియ‌న్’ త‌ర‌హాలోనే ఉంటుంద‌ని స‌మాచారం. సూప‌ర్ స్టార్ ర‌జినీకాంత్ ప‌ద్మ‌విభూష‌ణ్ పుర‌స్కారానికి ఎంపికైన రోజే ధ‌నుష్ హాలీవుడ్ ప్రాజెక్టు గురించి అనౌన్స్‌మెంట్ రావ‌డం విశేషం.