సూపర్ స్టార్ అల్లుడి కౌంటర్ వార్

రజనికాంత్ కాలా ఆడియో విడుదల సంబరం నిన్న చెన్నైలో అంగరంగ వైభవంగా జరగడం కోలీవుడ్ లో టాక్ అఫ్ ది టౌన్ గా మారింది. ఈ మధ్య ఇలాంటి ఆర్భాటాలకు దూరంగా ఉంటున్న తలైవా కాలా ప్రమోషన్ కోసం దీనికి ఓకే చెప్పక తప్పలేదు. అందులోనూ అల్లుడు నిర్మిస్తున్న సినిమా. ఒకరకంగా ఇది తన సినిమా కిందకే వస్తుంది. అందుకే ఇంత పెద్ద ఈవెంట్ కి గ్రీన్ సిగ్నల్ ఇచ్చాడు. ఇకపోతే ఈ వేడుకలో నిర్మాత కం రజని అల్లుడు ధనుష్ స్పీచ్ హాట్ టాపిక్ గా మారింది. సాధారణంగా ధనుష్ పబ్లిక్ స్టేజి మీద ఎప్పుడు మామ రజని గురించి ప్రత్యేకించి మాట్లాడిన సందర్భాలు చాలా తక్కువ. నిన్న మాత్రం తన మనసులో ఉన్నది మొత్తం చెప్పేసాడు. ముఖ్యంగా రాజకీయాల్లోకి వచ్చాక రజని మీద విమర్శలు కురిపిస్తున్న వాళ్ళను టార్గెట్ చేసాడు ధనుష్.

సమాజంలో పేరు సంపాదించుకోవడానికి రెండు రకాల మర్గాలున్నాయన్న ధనుష్ ఒకటి కష్టపడి స్వంతంగా తెచ్చుకోవడం అయితే రెండు ఇప్పటికే ఉన్నత శిఖరాలను చేరుకున్న వాళ్ళను విమర్శించడం ద్వారా అంటూ కాస్త గట్టిగానే చురక వేసాడు. ఇవి నేరుగా దర్శకుడు భారతి రాజాని ఉద్దేశించే ధనుష్ అన్నట్టు టాక్. రజినీకాంత్ రాజకీయ పార్టీ ప్రకటించినప్పుడు భారతి రాజా చాలా తీవ్రమైన కామెంట్స్ చేసాడు. అందుకే ధనుష్ ఇప్పుడు కౌంటర్ ఇచ్చాడు అనుకోవచ్చు. భారతిరాజా సినిమా ప్రస్థానం మొదలుపెట్టినప్పుడు ఇళయరాజా, రజనికాంత్ లతో కలిసే కెరీర్ లో గొప్ప విజయాలు సాధించారు. ఆయన రజనితో చాలా సన్నిహితంగా ఉండే వారు కూడా. మరి ఏమైందో కాని రజిని పొలిటికల్ ఎంట్రీ తర్వాత భారతి రాజా విరుచుకుపడటం ఆ టైంలో సంచలనం అయ్యింది. రజనికాంత్ కర్ణాటక వ్యక్తి అంటూ భారతి రాజా కామెంట్ చేయటమే ఈ వివాదానికి కారణం.ఇప్పుడు ధనుష్ కౌంటర్స్ కి బదులు చెప్పే ప్రయత్నం భారతి రాజా చేస్తారేమో చూడాలి.