నీదీ నాదీ ఒకే కథ.. ధనుష్ మంచి ఛాయిస్సే

విభిన్నమైన సినిమాలతో.. పాత్రలతో తనకంటూ ఒక ప్రత్యేకమైన గుర్తింపును సంపాదించాడు శ్రీవిష్ణు. ‘అప్పట్లో ఒకడుండేవాడు’.. ‘మెంటల్ మదిలో’ సినిమాలు అతడికి చాలా మంచి పేరు తెచ్చిపెట్టాయి. ఇప్పుడు ‘నీదీ నాదీ ఒకే కథ’ కూడా అతడికి ప్రత్యేకతను చాటిచెప్పింది. ఈ సినిమాలో కంటెంట్ గురించి.. ఇందులో శ్రీవిష్ణు నటన గురించి పెద్ద చర్చే నడుస్తోంది. ఈ చిత్రం గురించి టాలీవుడ్లో అనేకమంది ప్రముఖులు స్పందించారు. ప్రశంసలు కురిపించారు. ‘నీదీ నాదీ ఒకే కథ’పై కోలీవుడ్లోనూ డిస్కషన్లు నడుస్తున్నట్లు సమాచారం. సూపర్ స్టార్ రజినీకాంత్ తో ‘కబాలి’ నిర్మించిన అగ్ర నిర్మాత కలైపులి థాను కళ్లు ఈ సినిమాపై పడ్డాయని వార్తలు వినిపిస్తున్నాయి.

థాను త్వరలోనే ‘నీదీ నాదీ ఒకే కథ’ సినిమా చూడబోతున్నారని.. ధనుష్ తో ఈ చిత్రాన్ని రీమేక్ చేస్తే మంచి ఫలితం ఉంటుందని ఆయన భావిస్తున్నారని కోలీవుడ్లో గుసగుసలు వినిపిస్తున్నాయి. గతంలో తమిళంలో ఓ కొత్త సినిమా రాగానే రీమేక్ లేదా డబ్బింగ్ కోసం మన ప్రొడ్యూసర్లు కాచుకుని ఉండేవారు. ఈ మధ్య సీన్ రివర్సయి మన సినిమాలపై తమిళ నిర్మాతలు ప్రత్యేకంగా దృష్టిసారిస్తున్నారు. ధనుష్ ఇంతకుముందు ‘రఘువరన్ బీటెక్’లో చేసిన పాత్రకు ‘నీదీ నాదీ ఒకే కథ’లో హీరో పాత్రతో కొంచెం పోలికలుంటాయి. దీన్ని కొంచెం ఇంప్రొవైజ్ చేసి.. ధనుష్ కు తగ్గట్లు ఎంటర్టైనింగ్ గా మారిస్తే బాగానే వర్కవటయ్యే అవకాశముంది.