కోలీవుడ్‌లో అదిరిపోయే ఫైట్‌

పైకి స్నేహితుల్లాగే కనిపిస్తున్నా లోలోన ఒకరంటే ఒకరికి పడని హీరోలు మనదగ్గరా ఉన్నారు. ముఖ్యంగా హీరోల సంగతి ఎలా ఉన్నా ఫ్యాన్స్‌లో మాత్రం ఈ వైరం అప్పుడప్పుడూ బయటపడుతూనే ఉంటుంది. తమిళనాట ఈ సంస్కృతి బాగా ఎక్కువ. అక్కడ స్టార్‌ హీరోల ఫ్యాన్స్‌ మధ్య నిత్యం గొడవలే. రజినీకాంత్‌, కమల్‌ హాసన్‌ నిజంగానే మంచి స్నేహితులు. కానీ వాళ్లిద్దరి ఫ్యాన్స్‌ మధ్య ఎప్పట్నుంచో వైరం ఉంది. ఆ తర్వాతి తరానికి వస్తే అజిత్‌, విజయ్‌ ఫ్యాన్స్‌ మధ్య ఎప్పుడూ గొడవలే. తర్వాతి జనరేషన్‌ హీరోల్లో ధనుష్‌, శింబు ఫ్యాన్స్‌ మధ్య పచ్చగడ్డి వేస్తే భగ్గుమంటుంది.

ధనుష్‌ కంటే ముందు హీరోగా అరంగేట్రం చేసిన శింబు.. తనను తాను లిటిల్‌ సూపర్‌ స్టార్‌గా ప్రొజెక్ట్‌ చేసుకుంటుంటే.. మధ్యలో ఏ బ్యాగ్రౌండ్‌ లేని ధనుష్‌ సొంతంగా అభిమానుల్ని సంపాదించుకోవడమే కాక, రజినీ కాంత్‌ అల్లుడిగా మారి ఆయన ఫ్యాన్స్‌ను కూడా ఆకట్టుకున్నాడు. ఫ్యాన్‌ ఫాలోయింగ్‌ విషయంలో శింబు, ధనుష్‌.. ఎవరికి వారే సాటి. ఐతే ఇద్దరి అభిమానుల్లో ఒకరంటే ఒకరికి పడదు. శింబు సినిమా విడుదలైనపుడు ధనుష్‌ ఫ్యాన్స్‌ హేట్‌ క్యాంపైన్‌ చేస్తుంటారు. ధనుష్‌ సినిమా విడుదలైనపుడు శింబు ఫ్యాన్స్‌ కూడా ఇలాగే చేస్తుంటారు.

ఐతే ఈ శుక్రవారం ఈ ఇద్దరు యంగ్‌ హీరోల మధ్య రసవత్తర బాక్సాఫీస్‌ సమరం జరగబోతోంది. ధనుష్‌ కొత్త సినిమా 'మారి'.. చాన్నాళ్లుగా విడుదల కోసం ఎదురు చూస్తున్న శింబు సినిమా 'వాలు' ఈ నెల 17నే రిలీజవుతున్నాయి. ఈ రెండు సినిమాలూ ఆయా హీరోలకు ప్రెస్టీజియసే. దీంతో ఎవరిపై ఎవరు పైచేయి సాధిస్తారన్నది ఆసక్తికరంగా మారింది. అభిమానులైతే ఒకరిపై ఒకరు ఇప్పటికే దుమ్మెత్తి పోసుకుంటున్నారు. ఇక శుక్రవారం నాడైతే థియేటర్ల దగ్గర గొడవలు జరగడం ఖాయంగా కనిపిస్తోంది. మరి బాక్సాఫీస్‌ ఫైట్‌లో ఎవరు గెలుస్తారో చూడాలి.