ఎట్టకేలకు ధనుష్ సినిమా విడుదల తేదీ ఖరారు..!

కోలీవుడ్ స్టార్ హీరో ధనుష్ నటించిన 'కర్ణన్‌' సినిమా ఇటీవల థియేటర్లలో విడుదలై ఘన విజయం సాధించింది. అయితే దీని కంటే ముందే రెడీ అయిన ''జగమే తంతిరమ్'' సినిమాని మాత్రం ఇంకా రిలీజ్ చేయలేదు. ధనుష్ గ్యాంగ్‌ స్టర్‌ పాత్రలో నటించిన ఈ సినిమా తెలుగులో 'జగమే తంత్రం' పేరుతో రానుంది. ఇన్నాళ్లూ థియేట్రికల్ రిలీజ్ చేయాలని ఎదురు చూసిన మేకర్స్.. కోవిడ్ నేపథ్యంలో చివరకు డైరెక్ట్ ఓటీటీ పద్ధతిలో విడుదలకు డీల్ కుదుర్చుకున్నారు. ప్రముఖ డిజిటల్ ఫ్లాట్ ఫార్మ్ 'నెట్ ఫ్లిక్స్' లో ఈ సినిమాని రిలీజ్ చేస్తున్నట్లు అనౌన్స్ చేశారు. ఈ క్రమంలో స్ట్రీమింగ్ డేట్ ని నెట్ ఫ్లిక్స్ ప్రకటించింది.

''జగమే తంత్రం'' చిత్రాన్ని జూన్ 18న డిజిటల్ రిలీజ్ చేస్తున్నట్లు వెల్లడించారు. ఈ సందర్భంగా ధనుష్ కి సంబంధించిన ఓ స్టైలిష్ పోస్టర్ ని వదిలారు. ఇప్పటికే విడుదల చేసిన టీజర్ మంచి రెస్పాన్స్ తెచ్చుకుంది. త్వరలోనే ట్రైలర్ విడుదల చేసే అవకాశం ఉంది. 'జగమే తంతిరమ్' చిత్రానికి కార్తీక్ సుబ్బరాజ్ దర్శకత్వం వహించారు. ఇందులో ధనుష్ కి జోడీగా ఐశ్వర్య లక్ష్మీ నటించింది. ఈ చిత్రానికి సంతోష్ నారాయణ్ సంగీతం సమకూర్చారు. శ్రేయాస్ కృష్ణ సినిమాటోగ్రఫీ అందించగా వివేక్ హర్షన్ ఎడిటింగ్ వర్క్ చేశారు. వై నాట్ స్టూడియోస్ బ్యానర్ పై ఎస్.శశికాంత్ ఈ చిత్రాన్ని నిర్మించారు. చక్రవర్తి రామకృష్ణ కో ప్రొడ్యూసర్ గా వ్యవహరించారు.