ప్రేమమ్’ రీమేక్ చేయబోతున్న ధనుష్

ఈ ఏడాది మలయాళంలో బిగ్గెస్ట్ బ్లాక్ బస్టర్ గా నిలిచిన సినిమా ‘ప్రేమమ్’. తెలుగులో వచ్చిన ‘నా ఆటోగ్రాఫ్ స్వీట్ మెమొరీస్’ తరహాలో ఓ వ్యక్తి జీవితంలోని కొన్ని దశల్ని చూపిస్తూ అల్ఫోన్సో పుతెరిన్ తీసిన ఈ సినిమా మలయాళ ప్రేక్షకుల్నే కాదు.. మిగతా భాషల వాళ్లను కూడా విపరీతంగా ఆకట్టుకుంది. హైదరాబాద్ - చెన్నై లాంటి నగరాల్లోనూ ఇరగాడేసిందీ సినిమా. ‘ప్రేమమ్’ను తెలుగులో నాగచైతన్య హీరోగా చందూ మొండేటి రీమేక్ చేయబోతున్న సంగతి తెలిసిందే. ప్రస్తుతం స్క్రిప్ట్ వర్క్ జరుగుతోంది. త్వరలోనే సినిమా మొదలవుతుంది.

మరోవైపు తమిళంలోనూ ఈ సినిమాను రీమేక్ చేయబోతున్నారు. రీమేక్ రైట్స్ తీసుకున్నది మరెవరో కాదు.. ధనుష్. ఐతే ఆ సినిమాలో హీరో అతను కాదు. ధనుష్ అండతో ఎదిగిన విలక్షణ కథానాయకుడు విజయ్ సేతుపతి. ఈ మధ్యే ధనుష్ నిర్మాణంలో విజయ్ హీరోగా నటించిన ‘నానుమ్ రౌడీ దా’ సూపర్ డూపర్ హిట్టయింది. ఈ సినిమాతో విజయ్ సేతుపతి రేంజే మారిపోయింది. అతడితోనే ప్రేమమ్ సినిమాను రీమేక్ చేయాలని చూస్తున్నాడు ధనుష్. ముందు మలయాళ మాతృకలో నటించిన నివిన్ పౌలీతోనే ‘ప్రేమమ్’ రీమేక్ చేయాలని చూశాడు ధనుష్. కానీ తర్వాత మనసు మార్చుకుని విజయ్ సేతుపతిని హీరోగా ఎంచుకున్నాడు. త్వరలోనే ఈ సినిమా సెట్స్ మీదికి వెళ్లనుంది.