ధనుష్ హిట్ సినిమాకు సీక్వెల్.. డైరెక్టర్ క్లారిటీ!

కోలీవుడ్ సెన్సేషనల్ డైరెక్టర్ వెట్రిమారన్ ఎలాంటి సినిమా చేసినా కూడా అందులో ఎదో ఒక కొత్త పాయింట్ ను హైలెట్ చేయడానికి ప్రయత్నం చేస్తుంటాడు. అతని ప్రతీ సినిమా కూడా చాలా యూనిక్ గా ఉంటుంది అనేలా ఒక గుర్తింపు అందుకున్నాడు. ప్రస్తుతం ఈ తమిళ దర్శకుడు సౌత్ ఇండస్ట్రీలో ఒక డిఫరెంట్ డైరెక్టర్ గా క్రేజ్ అందుకున్నాడు. ఇక అతను ఇప్పటి వరకు ఫ్లాప్ కూడా ఎదుర్కొన్నది లేదు. ప్రతీ సినిమాలో ఒక సామాజిక అంశాన్ని హైలెట్ చేస్తూ మంచి గుర్తింపు అయితే అందుకుంటున్నాడు.

ప్రస్తుతం వెట్రి మారన్ సూర్యతో కలిసి వాడివాసల్ అనే మరొక విభిన్నమైన సినిమా చేస్తున్నాడు. హాస్యనటుడు సూరి ప్రధాన పాత్రలో నటించిన విడుతలై చిత్రానికి కూడా ఆయన దర్శకత్వం వహిస్తున్నారు. గ్యాప్ లేకుండా సినిమాలు చేస్తున్న వెట్రి మారిన్ తో సినిమాలు చేసేందుకు ప్రస్తుతం తమిళంలో అగ్ర నటీనటులు కూడా పోటీ పడుతున్నారు. అయితే ఆయన తన శిష్యులకు కూడా అవకాశాలు ఇప్పిస్తూ వారికి స్క్రిప్ట్ లలో కూడా సహకారం అందిస్తున్నారు.

అయితే వెట్రీ మారన్ కెరీర్ లో బిగ్గెస్ట్ హిట్ గా నిలిచిన చిత్రాల్లో వడ చెన్నై ఒకటి. ధనుష్‌కి కూడా ఆ సినిమా కల్ట్ క్లాసిక్ అని చెప్పవచ్చు. ఇక ఇటీవల ధనుష్ నటించిన తిరుచిత్రంబళం ఆడియో లాంచ్‌కు ఈ దర్శకుడు హాజరయ్యారు. ఈ సమయంలో వెట్రి మారన్ అభిమానులు వడ చెన్నై పార్ట్ 2 గురించి అడగడం ప్రారంభించారు. దీంతో స్టేజ్ పైనే ఈ దర్శకుడు ఒక క్లారిటీ ఇచ్చే ప్రయత్నం అయితే చేశాడు.

తన రెండు చిత్రాలను పూర్తి చేసిన వెంటనే వడ చెన్నై 2 కోసం పనిచేయడం ప్రారంభిస్తానని దర్శకుడు అభిమానులకు ఒక మాట అయితే ఇచ్చాడు. త్వరలో అతను యంగ్ టైగర్ ఎన్టీఆర్ తో కూడా సినిమా చేస్తాడని ఇటీవల ఒక టాక్ వచ్చిన విషయం తెలిసిందే. ఇక ఎప్పటి నుంచో విజయ్ తో కూడా సినిమా చేయాలని అనుకుంటున్నాడు. విజయ్ కూడా చాలాసార్లు కథలు విన్నాడు. కానీ ఇంకా ప్లాన్ ఏది సెట్ అవ్వలేదట. త్వరలోనే ఈ న్యూ కాంబినేషన్స్ సెట్స్ పైకి రావచ్చని సమాచారం.