మరో సంచలన సినిమాతో ధనుష్..

తమిళంలో ఎలాంటి బ్యాగ్రౌండ్ లేకున్నా.. కేవలం తన నట ప్రతిభతో పెద్ద స్టార్ గా ఎదిగిన కథానాయకుడు ధనుష్. ఒకప్పుడు వేరే భాషల వాళ్లు ఇతనేం హీరో అన్నట్లుగా చూసేవాళ్లు కానీ... ‘రాన్ జానా’తో హిందీ జనాలకు.. ‘రఘునరన్ బీటెక్’ సినిమాతో తెలుగు ప్రేక్షకులకు తనేంటో చాటి చెప్పాడు ధనుష్. ఇక తమిళ ప్రేక్షకులు అతడిని ఏ స్థాయిలో ఆదరిస్తారో ప్రత్యేకంగా చెప్పాల్సిన పని లేదు. రజనీ అల్లుడిగా మారాక అతడి రేంజ్ మరింత పెరిగింది. ఫ్యాన్ ఫాలోయింగ్ మరింత పెరిగింది. మరోవైపు అద్భుతమైన సినిమాలతో జాతీయ స్థాయిలో అతడి పేరు మార్మోగింది. ‘ఆడుగళం’ సినిమాతో ఏకంగా నేషనల్ అవార్డే తీసుకున్నాడతను. ఆ తర్వాత కూడా మరిన్ని వైవిధ్యమైన సినిమాలతో పలకరిస్తున్నాడు. తనకు జాతీయ అవార్డు తెచ్చిపెట్టిన దర్శకుడు వెట్రిమారన్ తో కలిసి అతను చేసిన మూడో సినిమా ‘వడ చెన్నై’ రెండు నెలల కిందటే విడుదలై మంచి విజయం సాధించింది.

దీని తర్వాత వీళ్లిద్దరి కాంబినేషన్లో మరో సినిమా రాబోతోంది. ఆ చిత్రం పేరు.. అసురన్. అసురుడంటే రాక్షసుడు. అంటే ధనుష్ ఇందులో నెగెటివ్ టచ్ ఉన్న పాత్రే చేస్తున్నాడని అనుకోవాలి. సినిమా అనౌన్స్ మెంట్ సందర్భంగా రిలీజ్ చేసిన లుక్ లో ధనుష్ కొత్తగా కనిపిస్తున్నాడు. మాస్ టచ్ కనిపిస్తోంది పోస్టర్లో. ధనుష్-వెట్రిమారన్ కలిసి ‘వడ చెన్నై’లో ఇంకా రెండు భాగాలు అందించాల్సి ఉంది. ఇది దశాబ్దం కాలంగా నానుతున్న సినిమా. ఎంతో పరిశోధన చేసిన దీన్ని ట్రయాలజీగా అందించాలనుకున్నాడు వెట్రి. ఐతే రెండో భాగానికి ముందు కొంచెం గ్యాప్ తీసుకుని ‘అసురన్’ చేస్తున్నాడు. ధనుష్ కొత్త సినిమా ‘మారి-2’ క్రిస్మస్ కానుకగా రెండు రోజుల కిందటే ప్రేక్షకుల ముందుకొచ్చింది. ఇది కొంచెం డివైడ్ టాక్ తో నడుస్తోంది. వసూళ్లయితే బాగానే ఉన్నాయి. ‘అసురన్’ చిత్రాన్ని అగ్ర నిర్మాత కలైపులి థాను నిర్మించనున్నాడు.