సితార వారితో ధనుష్ తెలుగు సినిమా ఖాయమే..!

కోలీవుడ్ స్టార్ హీరో ధనుష్ స్ట్రెయిట్ తెలుగు సినిమా చేస్తున్న సంగతి తెలిసిందే. ఇన్నాళ్లూ డబ్బింగ్ చిత్రాలతో తెలుగు ఆడియన్స్ ని అలరించిన ధనుష్.. సెన్సిబుల్ డైరెక్టర్ శేఖర్ కమ్ముల తో ఓ సినిమా చేయనున్నట్లు ఇటీవలే అధికారికంగా వెల్లడించారు. ఏషియన్ సునీల్ నారంగ్ సమర్పణలో శ్రీ వెంకటేశ్వర సినిమాస్‌ బ్యానర్‌ పై నారాయణ్‌ దాస్‌ నారంగ్‌ - రామ్మోహన్‌ రావు కలిసి ఈ చిత్రాన్ని నిర్మించనున్నారు. తెలుగు, తమిళం, హిందీ భాషల్లో ఈ సినిమా రూపొందనుంది. ఇదే క్రమంలో సితార ఎంటర్టైన్మెంట్స్ బ్యానర్ లో ధనుష్ ఓ సినిమా చేస్తున్నాడని వార్తలు వచ్చాయి.

'తొలిప్రేమ' 'మిస్టర్ మజ్ను' 'రంగ్ దే' వంటి చిత్రాలను తెరకెక్కించిన యంగ్ డైరెక్టర్ వంశీ అట్లూరి దర్శకత్వంలో ధనుష్ ఓ సినిమా చేస్తారని ప్రచారం జరిగింది. కానీ నిర్మాణ సంస్థ దీనికి సంబంధించి ఎలాంటి క్లూ ఇవ్వలేదు. అయితే ఇప్పుడు ధనుష్ తెలుగులో మరో సినిమా చేయనున్నాడనే వార్తలు నిజమే అనిపిస్తుంది. ఈరోజు ధనుష్ పుట్టినరోజు సందర్భంగా సితార ఎంటర్టైన్మెంట్స్ వారు స్పెషల్ పోస్టర్ తో ఆయనకు శుభాకాంక్షలు తెలిపారు. ఇందులో ధనుష్ నీట్ గా టక్ చేసుకొని ప్రొఫెషనల్ గా కనిపిస్తున్నాడు.

స్పెషల్ పోస్టర్ సితార ఎంటర్టైన్మెంట్స్ సంస్థ ధనుష్ కు బర్త్ డే విషెస్ అందించడంతో వీరి కలయికలో ఓ ప్రాజెక్ట్ రాబోతోందనే వార్తలకు బలం చేకూరింది. అందులోనూ వెంకీ అట్లూరి 'రంగ్ దే' సినిమా సమయంలోనే ఈ బ్యానర్ లో మరో మూవీ కమిట్ అయినట్లు టాక్ వచ్చింది. ఇదంతా చూసుకుంటే సితార బ్యానర్ లో ధనుష్ - వెంకీ కాంబినేషన్ లో ఓ మల్టీ లాంగ్వేజ్ ఫిలిం ఖాయంగా అనిపిస్తోంది.

ఇదిలా ఉంటే శేఖర్ కమ్ముల - ధనుష్ ప్రాజెక్ట్ కు సంబంధించిన పోస్టర్ కూడా ఈరోజు వచ్చింది. హీరోకి పుట్టినరోజు శుభాకాంక్షలు తెలుపుతూ నిర్మాతలు ప్రీ లుక్ ని వదిలారు. అలానే ధనుష్ ప్రస్తుతం నటిస్తున్న '#D43' చిత్రానికి టైటిల్ అనౌన్స్ చేయడంతో పాటుగా ఫస్ట్ లుక్ ని రిలీజ్ చేసారు. దీనికి ''మారన్'' అనే టైటిల్ ని ఖరారు చేశారు. కార్తీక్ నరేన్ దర్శకత్వం వహిస్తున్న ఈ చిత్రంలో మాళవిక మోహన్ హీరోయిన్ గా నటిస్తోంది.