కాక మొద‌లైంది.. వంగవీటి వెర్స‌స్ వంగ‌వీటి

జనాల్లో ఉద్రేకాలు రేకెత్తించే వివాదాస్ప‌ద నిజ జీవిత క‌థ‌ల‌తో సినిమాలు చేయ‌డం రామ్ గోపాల్ వ‌ర్మ‌కు అల‌వాటు. ర‌క్త‌చ‌రిత్ర‌, ముంబ‌యి 26/11, కిల్లింగ్ వీర‌ప్ప‌న్ లాంటి సినిమాలు ఆ కోవ‌లోకే వ‌స్తాయి. తాజాగా బెజ‌వాడ రౌడీ రాజ‌కీయాల నేప‌థ్యంలో వ‌ర్మ వంగ‌వీటి అనే సినిమాను అనౌన్స్ చేసిన సంగ‌తి తెలిసిందే. ఇలా అనౌన్స్ మెంట్ వ‌చ్చిందో లేదో ఆ సినిమాకు కావాల్సినంత ప‌బ్లిసిటీ వ‌చ్చేసింది. ఐతే వ‌ర్మ సినిమాను చూశాక ఆలోచ‌న వ‌చ్చిందో ఏమో కానీ.. ఒక‌ప్పుడు విప్త‌వ చిత్రాల‌తో మోత మోగించిన సీనియ‌ర్ డైరెక్ట‌ర్ ధ‌వ‌ళ స‌త్యం కూడా వంగ‌వీటి రంగా జీవిత క‌థ ఆధారంగా సినిమా తీయ‌బోతున్న‌ట్లు ప్ర‌క‌టించారు.

28 ఏళ్ల కింద‌ట బెజ‌వాడ రాజ‌కీయాలు, వంగ‌వీటి సోద‌రుల క‌థ‌తో ధ‌వ‌ళ స‌త్యం తీసిన ‘చైతన్యరథంస సంచ‌ల‌న విజ‌యం సాధించి 26 కేంద్రాల్లో శ‌త దినోత్స‌వం కూడా జ‌రుపుకుంది. ఇప్పుడు అదే ధవళ సత్యం దర్శకత్వంలో వంగవీటి రంగా జీవిత చరిత్ర ఆధారంగా మరో సినిమా రాబోతుంది. ‘రంగా మిత్రమండలి' సమర్పణలో ఎమ్‌ఎస్‌ఆర్‌ క్రియేషన్స్‌ పతాకంపై మంచాల సాయి సుధాకర్‌ నాయుడు ఈ చిత్రాన్ని నిర్మించ‌బోతున్నాడు.దీని గురించి ధ‌వ‌ళ స‌త్యం మాట్లాడుతూ.. ‘‘రంగా జీవిత కథను యథార్థ సంఘటనల నేపథ్యంలో తెరకెక్కించబోతున్నాం. దీనికి సంబంధించిన పూర్తి వివరాలను ఈ నెల 23న విజయవాడలో తెలియజేస్తాం’’ అన్నారు. ఈ సినిమాలో హీరోగా ఓ ప‌వ‌ర్ ఫుల్ స్టార్ న‌టిస్తాడ‌ని ధ‌వ‌ళ స‌త్యం చెప్ప‌డం విశేషం. మ‌రి ఆ స్టార్ ఎవ‌రు.. వ‌ర్మ ఈ సినిమా గురించి ఏమ‌ని స్పందిస్తాడు అన్న‌ది ఆస‌క్తిక‌రం.