ధృవ ఆ రోజుకే ఫిక్సయిపోండి

దసరాకే రావాల్సిన సినిమా ‘ధృవ’. కానీ అనుకోకుండా వాయిదా పడిపోయింది. రిలీజ్ డేట్ విషయంలో హడావుడి పడితే అసలుకే మోసం వచ్చేస్తుందని.. సినిమాను వాయిదా వేయడానికి రెడీ అయింది రామ్ చరణ్ అండ్ కో. దాని వల్ల పోయేదేం లేదు. ‘ధృవ’ టీజర్ చూశాక వాయిదా నిర్ణయం సరైందే అనిపించింది. సినిమాలో క్వాలిటీ స్పష్టంగా కనిపించింది. ఏమాత్రం రాజీ లేకుండా షూటింగ్ చేసుకుంటూ వచ్చింది ధృవ టీం. ఇప్పటి ఈ సినిమా దాదాపుగా పూర్తి కావచ్చింది. ఇక మిగిలింది ఒక్క పాట.. కొన్ని సన్నివేశాల చిత్రీకరణ మాత్రమే మిగిలి ఉంది. ఈ నెలాఖర్లోనే సినిమా మొత్తం పూర్తయిపోతుంది.

పోస్ట్ ప్రొడక్షన్.. ప్రమోషన్ తాపీగా చేసుకోవడానికి వీలు చిక్కుతోంది. ముందు సినిమా ఇంకాస్త ఆలస్యం కావచ్చన్న ఉద్దేశంతో రిలీజ్ డేట్ విషయంలో కొంత అయోమయంలో ఉన్నాడు నిర్మాత అల్లు అరవింద్. ఇప్పుడిక ఆయన డిసెంబరు 2కే సినిమాను రిలీజ్ చేయాలని నిర్ణయించారట. పీఆర్వో బీఏ రాజు కూడా ‘ధృవ’ రిలీజ్ డేట్ గురించి మీడియాకు సమాచారం ఇచ్చేశారు. తమిళ బ్లాక్ బస్టర్ ‘తనీ ఒరువన్’కు రీమేక్ గా తెరకెక్కుతున్న ‘ధృవ’కు సురేందర్ రెడ్డి తనదైన స్టైలిష్ టచ్ ఇచ్చినట్లే కనిపిస్తోంది. దసరాకు రిలీజైన టీజర్ సినిమా మీద అంచనాల్ని అమాంతం పెంచేసింది. రకుల్ ప్రీత్ కథానాయికగా నటిస్తున్న ఈ చిత్రంలో తమిళంలో చేసిన అరవింద్ స్వామే విలన్ పాత్రలో కనిపించబోతున్నాడు.

Like Us on Facebook : https://www.facebook.com/Tupakidotcom/