‘ధృవ’ గురించి ఒక ఆశ్చర్యకర వార్త

తెలుగు రాష్ట్రాలు రెండుగా విడిపోయాక సినిమా వాళ్లకు కొన్ని ఇబ్బందులు తలెత్తాయి. ఇంతకుముందు లాగా హైదరాబాద్ లో ప్రమోషన్లు కానిచ్చేస్తే కుదరట్లేదు. ఎంతైనా ఇది తెలంగాణ సిటీ. ఆంధ్రప్రదేశ్ జనాల్ని ప్రత్యేకంగా ఆకట్టుకోవడానికి అక్కడికెళ్లి కార్యక్రమాలు చేయాల్సి వస్తోంది. ఇందుకోసం కొన్ని సినిమాల ఆడియో వేడుకల్ని.. ప్రి రిలీజ్ వేడుకల్ని విజయవాడలోనో.. విశాఖపట్నంలోనో చేస్తున్నారు నిర్మాతలు. గీతా ఆర్ట్స్ సంస్థ అయితే తమ ప్రతి సినిమాకూ ఆంధ్రప్రదేశ్ లోని ఏదో ఒక నగరంలో ఒక వేడుక చేస్తోంది. ‘సరైనోడు’ ప్రి రిలీజ్ వేడుక విశాఖపట్నంలోనే చేసిన సంగతి తెలిసిందే. ఈ సంస్థలో వస్తున్న కొత్త సినిమా ‘ధృవ’కు కూడా ఇలాగే ప్రి రిలీజ్ ఈవెంట్ ను విజయవాడలో చేస్తారంటూ వార్తలు వచ్చాయి.

ఐతే తాజా సమాచారం ప్రకారం ‘ధృవ’ ప్రి రిలీజ్ ఈవెంట్ వేదికను మార్చారట. ఈ వేదిక ఆంధ్ర నుంచి తెలంగాణకు మారినట్లు సమాచారం. అలాగని హైదరాబాద్ లోనే ఈ ఫంక్షన్ చేస్తున్నారనుకుంటే పొరబాటే. వరంగల్ వేదికగా ఈ వేడుక చేస్తారట. ఇలా హైదరాబాద్ ను దాటి తెలంగాణలోని మరో సిటీలో ఓ పెద్ద వేడుక జరగడం ఆశ్చర్యకరమైన విషయం. అందులోనూ గీతా ఆర్ట్స్ వాళ్లు వరంగల్ సిటీలో వేడుక చేయడం ఊహకందని విషయం. నవంబరు 20న ఈ ప్రీ రిలీజ్ ఈవెంట్ చేస్తారని వార్తలొస్తున్నాయి. ఈ సినిమాకు ఆడియో వేడుక నిర్వహించకుండా ఈ నెల 9న నేరుగా మార్కెట్లోకి ఆడియోను రిలీజ్ చేస్తున్న సంగతి తెలిసిందే. డిసెంబరు 2న ‘ధృవ’ ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/