బాలయ్యకి సెకండ్ బెస్ట్ ఓపెనింగ్

నందమూరి బాలకృష్ణ నటించిన డిక్టేటర్ ఎన్నో అంచనాలతో థియేటర్లలోకి వచ్చింది. ఆ ఎక్స్ పెక్టేషన్స్ ఏ మాత్రం తగ్గకుండా బాలయ్య చేసిన మాస్ రచ్చతో.. అభిమానులు పొంగల్ పండుగను థియేటర్లలోనే చేసేసుకుంటన్నారు. పండుగ సెలవల్లో రిలీజ్ కావడంతో.. ఓపెనింగ్స్ విషయంలో అదరగొడుతున్నాడీ నందమూరి హీరో.

తొలి రోజు రికార్డు కలెక్షన్లను రాబట్టాడు డిక్టేటర్. ఏపీ, తెలంగాణల్లో ఏకంగా 5.79 కోట్ల షేర్ ను వసూలు చేసింది ఈ సినిమా. బాలయ్య సినిమాల్లో ఇది రెండో అత్యధిక వసూలు కావడం గమనించాలి. బాలయ్య చిత్రాల్లో లెజెండ్ టాప్ ప్లేస్ లో ఉండగా.. ఇప్పటికీ అదే ఫస్ట్ ప్లేస్ ని కంటిన్యూ చేస్తోంది. ఎంతో పోటీ మధ్య రిలీజ్ కావడంతో.. అత్యధిక కలెక్షన్లకు కాస్త దూరంలో ఆగిపోయింది డిక్టేటర్. అలాగే ఏ క్లాస్ సెంటర్లలో అంత భారీ స్థాయిలో కలెక్షన్లు రాకపోవడం కూడా ప్రభావం చూపింది. కానీ బీ,సీ సెంటర్లలో మాత్రం బాలయ్య తన పట్టు గట్టిగానే చూపించాడు.

తనకు బాగా పట్టున్న సీడెడ్ లో మొదటి రోజున 1.30 కోట్ల వసూళ్లు వసూలు చేశాడు బాలయ్య. నైజాంలో 1.13 కోట్లు రాగా, ఈస్ట్ నుంచి 0.55 కోట్లు వచ్చాయి. వెస్ట్ లో 0.49 కోట్లు, గుంటూరు 1.06 కోట్లు, కృష్ణాలో 0.35 కోట్లు, వైజాగ్ 0.54 కోట్లు, నెల్లూరు ఏరియాలో 0.40 కోట్లు వసూలయ్యాయి. బీ, సీ సెంటర్లలో కలెక్షన్స్ పెరుగుతుండడంతో.. వీకెండ్ దాటేవరకూ ఇదే మొత్తం కంటిన్యూ అవుతుందని ఇండస్ట్రీ వర్గాలు అంచనా వేస్తున్నాయి.