క‌ల్యాణ్ దేవ్ ఆ సినిమాని వ‌దిలేశాడా?

టాలీవుడ్ లో వారసుల‌కు కొద‌వ‌లేద‌న్న‌ది తెలిసిందే. హీరోల త‌న‌యుల నుంచి నిర్మాత‌, ద‌ర్శ‌కుల త‌న‌యులు వెండితెర‌పై అరంగేట్రం చేస్తూనే వున్నారు. ఈ మ‌ధ్య స్టార్ హీరోల బంధువులు, అల్లుళ్లు కూడా హీరోలుగా ప్ర‌య‌త్నాలు చేస్తున్నారు. ఇప్ప‌టికే కొంత మంది రంగంలోకి దిగి స‌క్సెస్ అయితే మ‌రి కొంత మంది స‌క్సెస్ కోసం శ్ర‌మిస్తున్నారు. ఈ కోవ‌లో ఇప్ప‌టికే సూప‌ర్ స్టార్ కృష్ణ అల్లుడు, మ‌హేష్ బాబు బావ సుధీర్ బాబు హీరోగా ఎంట్రీ ఇచ్చి స‌క్సెస్ ఫుల్ హీరో అనిపించుకుంటున్న విష‌యం తెలిసిందే.

కెరీర్ ప్రారంభంలో హీరోయిన్ సోద‌రుడిగా న‌టించినా... హీరోగా ప్ర‌య‌త్నాలు చేసినా ముందు ఆయ‌న‌ని ఎవ‌రూ పెద్ద‌గా ప‌ట్టించుకోలేదు. కానీ `ప్రేమ‌క‌థా చిత్రమ్‌` స‌క్సెస్ తో సుధీర్‌బాబు కెరీర్ ఒక్క‌సారిగా మారిపోయింది. ప్ర‌స్తుతం హీరోగా బిజీగా మారిన సుధీర్ బాబు త‌ర‌హాలోనే మెగా ఫ్యామిలీ అల్లుడు క‌ల్యాణ్ దేవ్ కూడా హీరోగా ప్ర‌య‌త్నాలు చేస్తున్నారు.

మెగాస్టార్ నటించిన `విజేత‌` సినిమా పేరుతో తొలి చిత్రాన్ని చేసిన క‌ల్యాణ్ దేవ్ ఈ మూవీ ఆశించిన ఫ‌లితాన్ని అందించ‌లేక‌పోయినా రెట్టించిన ఉత్సాహంతో సూప‌ర్ మ‌చ్చి, కిన్నెర సాని చిత్రాల‌ని లైన్ లో పెట్టేశాడు. ఈ రెండు చిత్రాలు ఒకేసారి విడుద‌ల‌కు సిద్ధ‌మ‌య్యాయి. అయితే ఈ రెండు చిత్రాల్లో సూప‌ర్ మ‌చ్చి` చిత్రానికి ఇప్ప‌టి వ‌ర‌కు ఎలాంటి ప‌బ్లిసిటీ ని స్టార్ట్ చేయ‌లేదు. క‌ల్యాణ్ దేవ్ కూడా ఈ మూవీకి సంబంధించిన ప్ర‌చార కార్య‌క్రామాల్లో ఇప్ప‌టి వ‌ర‌కు పాల్గొన‌లేదు.

ఇదే చిత్రంతో పాటు `కిన్నెర సాని` చిత్రం కూడా విడుద‌ల‌కు సిద్ధమైంది. `అశ్వద్థామ‌` ఫేమ్ ర‌మ‌ణ తేజ ఈ మూవీని రూపొందించారు. త్వ‌ర‌లోనే ఈ మూవీ ప్ర‌మోష‌న్స్ ప్రారంభం కానున్నాయి. అయితే క‌ల్యాణ్ దేవ్ ఈ సినిమా ప్ర‌మోష‌న్స్ లో అయినా పాల్గొంటారా? లేదా అన్న‌ది ఆస‌క్తిక‌రంగా మారింది. సూప‌ర్ మ‌చ్చి` జ‌న‌వ‌రి 14న విడుద‌ల కాబోతోంది. స‌స్పెన్స్ థ్రిల్ల‌ర్ మూవీగా రూపొందిన `కిన్నెర సాని` జ‌న‌వ‌రి 26న విడుద‌ల కాబోతోంది. ఇప్ప‌టికే విడుద‌లైన ఈ చిత్ర ప్రోమోలు ఆస‌క్తిని రేకెత్తిస్తున్నాయి.