ఆర్ ఆర్ ఆర్ లో ఉన్నట్టా లేనట్టా ?

మొదలుపెట్టడంలో కొంత ఆలస్యం జరిగినా ఆ తర్వాత యమా స్పీడ్ తో షూటింగ్ జరుపుకుంటున్న రాజమౌళి ఆర్ఆర్ఆర్ ఇంకా హీరోయిన్ల సంగతే ఎటూ తేల్చడం లేదు. అలియా భట్ గురించి దాదాపు క్లారిటీ వచ్చేసినట్టే. తన డైరీ చూస్తే నెల రోజుల కాల్ షీట్లు అడిగినా నేరమే. బాలీవుడ్ సినిమాలతోనే పాప అంత బిజీగా ఉంది. ఇక మరో బ్యూటీ పరిణితి చోప్రాతో సైతం చర్చలు జరిగాయన్న వార్తలు గత కొద్ది రోజులుగా వస్తూనే ఉన్నాయి. నేరుగా అడుగుదాం అంటే మన మీడియాకు అందుబాటులో ఉండే ఛాన్స్ లేదు కాబట్టి ఏ అప్ డేట్ అయినా ముంబై నుంచి రావాల్సిందే.

తాజాగా అక్షయ్ కుమార్ కేసరి ప్రమోషన్స్ లో చాలా యాక్టివ్ గా ఉన్న పరిణితి చోప్రాకు ఆర్ఆర్ఆర్ కు సంబంధించిన ప్రశ్న ఎదురైంది. మీరు ఈ సినిమాలో నటిస్తున్నారటగా అనే క్వశ్చన్ కు చాలా గడుసుగా సమాధానం ఇచ్చింది. తాను చేయబోయే సినిమాల పూర్తి వివరాలు ఇంకొక్క వారంలో తెలియజేస్తానని అంతే తప్ప ఊహాగానాలను ఆధారం చేసుకుని ఎలాంటి నిర్ధారణకు రావద్దని కోరింది.

ఒకవేళ నిజంగా పరిణితికి ఆ ఆఫర్ రాకపోయి అప్పటికప్పుడు ఖండించేసి నో నో చేయడం లేదని మైక్ ముందు చెప్పేయొచ్చు. మరోసారి ఇంకెవరు అడిగే సాహసం చేయరు. కానీ పరిణితి సమాధానం అలా లేదు. వెయిట్ చేయండి టైం తీసుకుని కొత్త ప్రాజెక్ట్స్ డీటెయిల్స్ అన్ని చెబుతాను అంటోంది. దీనర్ధం ఏదో గుట్టును దాస్తోంది అంటే ఆర్ఆర్ఆర్ అవకాశం వచ్చిన వార్త పూర్తి అబద్దం కాదని చెప్పకనే చెప్పినట్టే. అదీ సంగతి.