దిల్ రాజు భారీ ప్లానింగే..

ఒకప్పటితో పోలిస్తే గత రెండేళ్లలో దిల్ రాజు జోరు తగ్గింది. భారీ సినిమాలు చేయట్లేదు. వరుసగా సినిమాలు తీయట్లేదు. మధ్యలో మధ్యలో గ్యాప్ తీసుకుంటున్నాడు. పైగా ఆయన బేనర్లో ఓ మోస్తరు సినిమాలే వస్తున్నాయి. ఐతే ఈ మధ్య ‘సుప్రీమ్’తో మంచి విజయాన్ని ఖాతాలో వేసుకున్న రాజు.. ఈ ఊపులో క్రేజీ కాంబినేషన్లతో నెల వ్యవధిలో మూడు సినిమాలు మొదలుపెట్టేస్తున్నాడు. ఆల్రెడీ నాని హీరోగా ‘నేను లోకల్’ ప్రారంభోత్సవం జరుపుకుంది. శర్వానంద్ హీరోగా ‘శతమానం భవతి’ కూడా సెట్స్ మీదికి వెళ్తోంది. అల్లు అర్జున్ హీరోగా హరీష్ శంకర్ దర్శకత్వంలో తెరకెక్కించబోయే సినిమా కూడా ఇంకో నెల రోజుల్లోనే ప్రారంభం కాబోతోంది.

ఈ మూడు సినిమాలతో మూడు సీజన్లను టార్గెట్ చేశాడు రాజు. ముందుగా వీటిలో ‘నేను లోకల్’ ఈ ఏడాది చివర్లో క్రిస్మస్ సీజన్లో రిలీజ్ చేస్తారట. ఇక ‘శతమానం భవతి’ సంక్రాంతికి అని ఆల్రెడీ ప్రకటించాడు దిల్ రాజు. ఇక రాజు బేనర్లో చాన్నాళ్ల తర్వాత రాబోతున్న భారీ బడ్జెట్ సినిమా అయిన హరీష్-బన్నీ మూవీని వేసవికి రిలీజ్ చేయాలన్నది ప్లాన్. ఇలా మూడు సీజన్లకు మూడు క్రేజీ ప్రాజెక్టుల్ని లైన్లో పెట్టాడు రాజు. ఇక వచ్చే ఏడాది వేసవి తర్వాతి సీజన్ల కోసం కూడా కొన్ని ప్రాజెక్టులు సిద్ధమవుతున్నాయి. అవి ఇంకా చర్చల దశలోనే ఉన్నాయి. అందులో ఒకటి త్రివిక్రమ్ దర్శకత్వంలో రావాల్సిన సినిమా. ఈ సినిమాలతో మళ్లీ ఒకప్పట్లా టాప్ ఫామ్ అందుకోవాలని చూస్తున్నాడు రాజు.