డబ్బుకోసం సినిమా కాదంటున్న దిల్ రాజు

డబ్బు కావాలా..? పేరు ప్రఖ్యాతలు కావాలా అని ఏ నిర్మాతను అడిగినా ఏం చెప్తారు.. పేరు ప్రఖ్యాతలతో పాటు డబ్బు కావాలంటారు.. కానీ టాలీవుడ్ స్టార్ ప్రొడ్యూసర్ దిల్ రాజు మాత్రం తనకు డబ్బు వద్దు తృప్తికావాలని తాజాగా స్టేట్ మెంట్ ఇచ్చారు. బొమ్మరిల్లు - శతమానం భవితి సినిమాలతో ఎంతో మంచి పేరు వచ్చిందని.. అలాంటి తృప్తి లభించాలని కోరుకుంటున్నానని తెలిపారు.

దిల్ రాజు నిర్మాణంలో నితిన్ హీరోగా తాజాగా ‘శ్రీనివాసకళ్యాణం’ మూవీ రూపొందుతోంది. ఈ చిత్రాన్ని ఆగస్టు 9న రిలీజ్ చేయనున్నట్టు తాజాగా దిల్ రాజు ప్రకటించారు. ఆ తేదీతో తనకున్న సెంటిమెంట్ ను బయటపెట్టాడు. బొమ్మరిల్లు, శతమానం భవితి మూవీలను ఆగస్టు 9నే రిలీజ్ చేశామని.. అవి రెండు నా జీవితంలోనే గొప్ప పేరు తీసుకొచ్చిన చిత్రాలుగా మిగిలిపోయాయన్నారు. ఇప్పుడు ‘శ్రీనివాసకళ్యాణం’ మూవీని కూడా అదే తేదీన రిలీజ్ చేస్తున్నామన్నారు. ఈ సినిమాకు అదే రోజు ఫిక్స్ కావడం యాధృశ్చికంగానే కలిసి వచ్చిందన్నారు.

‘నా బ్యానర్ నుంచి మరో బెస్ట్ ఫిలిం వస్తోంది. అదే శ్రీనివాస కళ్యాణం. సినిమా బాగుంటే డబ్బు అదే వచ్చేస్తుంది. డబ్బుకంటే ఎక్కువగా విలువలున్న సినిమా తీస్తే ఎంత పేరు వస్తుందో శతమానం భవితి - బొమ్మరిల్లు సినిమాలతో చూశాను. మళ్లీ ‘శ్రీనివాసకళ్యాణం’తో నాకు అంత పేరు వస్తుందని ఆశ పడుతున్నా.. ఆ తృప్తికావాలి నాకు..’ అని దిల్ రాజ్ అన్నారు.

శ్రీనివాసకళ్యాణం మూవీకి ముందుగా కళ్యాణం అనే టైటిల్ అనుకున్నాం. హీరో పేరు శ్రీనివాస్. ఇంట్లో అంతా వాసు అని పిలుస్తారు. అమ్మాయి పేరు శ్రీ. ఈ రెండు పేర్లు కలిసేలా శ్రీనివాస కళ్యాణం అనే టైటిల్ పెట్టాం. ’ అని దిల్ రాజు తెలిపారు.

ఇటీవల అశ్వినీదత్ తను తీసిన ‘జగదీక వీరుడు.. అతిలోక సుందరి’ మూవీ రిలీజ్ నాడే ‘మహానటి’ని రిలీజ్ చేసి గ్రాండ్ హిట్ ను అందుకున్నాడు. అదే సెంటిమెంట్ తో ఇప్పుడు దిల్ రాజు కూడా తన లేటెస్ట్ చిత్రం ‘శ్రీనివాసకళ్యాణం’ను బొమ్మరిల్లు రిలీజ్ రోజే రిలీజ్ చేస్తున్నాడు. మరి ఈ చిత్రం ఎన్ని సంచలనాలు సృష్టిస్తుందో చూడాలి మరి..