`మిర్చి` సెంటిమెంటుతో స్టెప్పేశాడండోయ్‌!

రెండు ప‌రాజ‌యాలు నిర్మాత దిల్‌రాజును ఎంత‌గా క‌ల‌వ‌ర‌పాటుకు గురి చేశాయో అర్థం చేసుకోవాలంటే నిన్న‌టి సాయంత్రం `హలో గురూ ప్రేమ‌కోస‌మే` ప్రీరిలీజ్ ఈవెంట్‌ని చూసి తీరాలి. ఈ ఈవెంట్‌లో ఊహాతీతం అనిపించే కొన్ని స్పెష‌ల్ మూవ్‌మెంట్స్ జ‌నాల్లో చ‌ర్చ‌కు తావిచ్చాయి. అస‌లింత‌కీ అంత‌గా చెప్పుకునేందుకు ఏం జ‌రిగింది? అంటే లైవ్ ఈవెంట్‌లో నిర్మాత కం పంపిణీదారుడు దిల్‌రాజు చేసిన ఆ ఒక్క ప‌నీ హాట్ టాపిక్‌. ఇంత‌కీ ఆయ‌నేం చేశాడేంటి?

ఈ లైవ్ ఈవెంట్‌లో ఓవైపు కుర్రాళ్లంతా ఒక‌టే జోరుమీదున్నారు. రామ్ - అనుప‌మ ఒక‌రినొక‌రు చూసుకుంటూ తెగ క‌వ్వింత‌గా న‌వ్వేసుకుంటున్నారు. మ‌రోవైపు రాక్ స్టార్ దేవీశ్రీ త‌న‌లోని ఎన‌ర్జీని ఎలివేట్ చేస్తూ వేదిక‌ను హుషారెత్తిస్తున్నాడు. ద‌ర్శ‌కుడు త్రినాధ‌రావు ఆనందానికి అయితే అవ‌ధులే లేవు. ఆ దృశ్యం క‌న్నుల‌పండువ‌నే త‌ల‌పించింది. మేమింతే లొకేష‌న్ లోనూ ఇలాగే చేసేవాళ్లం అంటూ దిల్ రాజు అంత‌టివాడు తెగ ఇదైపోయాడు. గంటా ప‌ది నిమిషాలు క‌డుపు చెక్క‌ల‌య్యేలా న‌వ్విస్తాం.. టైమ్ లెక్క చూస్కోండి! అని స‌వాల్ విసిరిన దిల్ రాజు అటుపై ఏం చేశాడంటే?

అస‌లు పాడ‌లేని వాళ్ల చేత పాడించ‌డం, ఆడ‌లేని వాళ్ల చేత ఆడించ‌డం త‌న ప్ర‌త్యేక‌త అని నిరూపించిన దేవీశ్రీ ప్ర‌సాద్ ఈసారి హ‌లో గురూ ప్రేమ‌కోస‌మే వేదిక‌పై దిల్ రాజు చేత స్టెప్పులేయించాడు. ఈ సినిమాలో ఓ వెజిటేరియ‌న్‌ సాంగ్ లో నాన్ వెజ్ అదిరిపోతుంద‌ని హింటిచ్చిన దేవీ అదే టైపులో దిల్ రాజు స్టెప్పులేస్తారు అంటూ వెంట‌ప‌డడంతో ఇక దిల్ రాజు సైతం `మిర్చి` సెంటిమెంటా? అలాంటి మ‌రో హిట్టొస్తుంద‌నే నా చేత డ్యాన్సులు చేయిస్తున్నాడు.. అంటూ రామ్, అనుప‌మ‌తో క‌లిసి స్టెప్పులు అద‌ర‌గొట్టేశారు. దిల్ రాజు డ్యాన్సులు చేయ‌డం కార్య‌క్ర‌మానికే హైలైట్. రాజా స్టెప్పేస్తుంటే భూమి క‌దిలిందంటే న‌మ్మండి!! అన్న‌ట్టు రాజ‌కీయాల్లో, క్రీడ‌ల్లో జ‌యాప‌జ‌యాలు ఉన్న‌ట్టే సినిమావోళ్ల‌కు ఉంటాయిలే! హిట్టొచ్చినంత మాత్రాన మేమేం ఫీలైపోతామా.. అంటూ దిల్‌రాజు కాస్త దీర్ఘంగానే వివ‌ర‌ణ ఇచ్చారు సుమీ!! అక్టోబ‌ర్ 18న వ‌స్తున్న `హ‌లో గురూ ప్రేమ‌కోస‌మే` హిట్ట‌యితే కాస్త మ‌న‌సు శాంతిస్తుంద‌న‌డంలో సందేహం లేదు.