మైత్రీ కి గట్టి పోటీ ఇస్తున్న దిల్ రాజు..!

తెలుగు చిత్ర పరిశ్రమలోని పెద్ద నిర్మాణ సంస్థలలో శ్రీ వెంకటేశ్వర క్రియేయేషన్స్ - మైత్రీ మూవీ మేకర్స్ వారు పోటీపడి సినిమాలు నిర్మిస్తున్నారు. స్టార్ ప్రొడ్యూసర్ దిల్ రాజు కాంపౌండ్ లో ప్రస్తుతం 5 సినిమాల పనులు జరుగుతున్నాయి. మరోవైపు నిర్మాతలు నవీన్ యెర్నేని - రవి శంకర్ యలమంచిలి కలిసి సుమారు 10 క్రేజీ ప్రాజెక్ట్స్ లైన్ లో పెట్టారు. ఇప్పటికే 'పుష్ప' 'సర్కారు వారి పాట' 'అంటే సుందరానికీ!' సినిమాలను సెట్స్ పైకి తీసుకెళ్లారు. ఇదే క్రమంలో చిరంజీవి - డైరెక్టర్ బాబీ కాంబోలో ఓ సినిమా.. నందమూరి బాలకృష్ణ - గోపీచంద్ మలినేని కలయికలో ఓ మూవీ.. పవన్ కళ్యాణ్ - హరీష్ శంకర్ కాంబినేషన్లో ఓ చిత్రం ప్రకటించారు. అలానే ప్రభాస్ - ఎన్టీఆర్ - విజయ్ దేవరకొండ లకు అడ్వాన్సులు ఇచ్చి ఉన్నారు.

టాలీవుడ్ లో స్టార్ హీరోలందరితో సినిమాలు కమిటై దూకుడుమీదున్న మైత్రీ వారికి, ఇప్పుడు దిల్ రాజు గట్టి పోటీ ఇస్తున్నారు. ఇప్పటికే 'ఎఫ్ 3' 'థ్యాంక్యూ' 'పాగల్' 'రౌడీ బాయ్స్' వంటి సినిమాలు చేస్తున్న దిల్ రాజు.. ఇటీవలే స్టార్ డైరెక్టర్ శంకర్ - రామ్ చరణ్ కాంబోలో పాన్ ఇండియా మూవీ అనౌన్స్ చేశాడు. ఈ క్రమంలో ఇప్పుడు కోలీవుడ్ స్టార్ హీరోతో విజయ్ తో సినిమా చేయడానికి గ్రీన్ సిగ్నల్ తెచ్చుకున్నాడు. వంశీ పైడిపల్లి దర్శకత్వంలో ఈ బైలింగ్వల్ తెరకెక్కనుంది. దీనికి సంబంధించిన అధికారిక ప్రకటన రానప్పటికీ, విజయ్ నటించబోయే 66వ సినిమా ఇదేనని తెలుస్తోంది.

వాస్తవానికి విజయ్ తో సినిమా చేసి కోలీవుడ్ లో అడుగు పెట్టాలని మైత్రీ టీమ్ ఎప్పటి నుంచో అనుకుంటోంది. అయితే ఇప్పుడు దిల్ రాజు సైలెంటుగా అదే హీరోతో ప్రాజెక్ట్ సెట్ చేసుకొని షాక్ ఇచ్చాడు. 'RC15' పనుల్లో భాగంగా చెన్నైకి రెగ్యులర్ గా వెళ్తూ వస్తున్న దిల్ రాజు.. విజయ్ టీమ్ తో టచ్ లో ఉంటూ డేట్స్ తెచ్చుకున్నారు. ముందే ఈ విషయం ఎక్కడా బయటకు పొక్కకుండా జాగ్రత్త పడి, విజయ్ నుంచి గ్రీన్ సిగ్నల్ వచ్చాక న్యూస్ బయటకు వదిలినట్లు టాక్ నడుస్తోంది. ఏదేమైనా టాలీవుడ్ స్టార్ హీరోలతో సినిమాలు చేస్తున్న మైత్రీ బృందానికి.. కోలీవుడ్ డైరెక్టర్ - స్టార్ హీరోలతో సినిమాలు కమిటైన దిల్ రాజు గట్టి పోటీ ఇస్తున్నాడని ఫిలిం సర్కిల్స్ లో కామెంట్స్ వినిపిస్తున్నాయి.