దిల్ రాజుకి హుషారు తెచ్చిందిగా!!

కోలీవుడ్ స్టార్ హీరో విజయ్ నటించిన తెరి ఈ నెల 14న తమిళ ఉగాది సందర్భంగా గ్రాండ్ గా రిలీజ్ అవుతోంది. ఈ మూవీకి తెలుగు వెర్షన్ కూడా ఇప్పటికే సిద్ధమైపోయింది. పోలీసోడు పేరుతో డబ్బింగ్ చేసి రెడీగా ఉంచారు. తమిళ్ వెర్షన్ తోపాటే విడుదల చేయాలని మొదట అనుకున్న దిల్ రాజు.. ఇక్కడ పవన్ మూవీ సర్దార్ గబ్బర్ సింగ్ కారణంగా వెనక్కి తగ్గాడు.

పోలీసోడు ఆడియో ఫంక్షన్ కూడా క్యాన్సిల్ చేసేసి.. విడుదలను హోల్డ్ లో పెట్టిన దిల్ రాజుకి.. ఇప్పుడు సర్దార్ రిజల్ట్ పై వచ్చిన టాక్ హుషారు వచ్చింది. వచ్చేవారం పవన్ ప్రభంజనం ఉండదనే అంచనాకి వచ్చిన దిల్ రాజు.. ఏప్రిల్ 14నే పోలీసోడు చిత్రాన్ని విడుదల చేసేందుకు సిద్ధమైపోయాడు. ప్రమోషన్స్ కోసం అంతా సిద్ధం చేసుకోవడమే కాదు.. డైరెక్టర్ అట్లీకి కూడా ఇప్పటికే పిలుపు పంపాడట ఈ నిర్మాత.

ఒకటి రెండు సార్లు ఇలయ దళపతి విజయ్ ను కూడా తెలుగు వెర్షన్ కి ప్రచారం చేయాల్సిందిగా అహ్వానించాడంటున్నారు. హైద్రాబాద్ వచ్చి ఓ రెండు ఈవెంట్స్ కి అటెండ్ అయితే.. ఇక వాటిని ఉపయోగించి ప్రచారం ఎలా చేసుకోవాలో దిల్ రాజుకు బాగానే తెలుసు. మొత్తానికి సర్దార్ గబ్బర్ సింగ్ పై వచ్చిన బ్యాడ్ టాక్.. ఇతర నిర్మాతలకు బాగానే హుషారు తీసుకొచ్చిందన్న మాట.