ఆ హీరోపై దిల్ రాజుకు అంత ఇంట్రెస్టా?

అగ్ర నిర్మాత దిల్ రాజుకు ఈ మధ్య తమిళ సినిమాల మీద ఇంట్రెస్ట్ పుడుతోంది. గత ఏడాది మణిరత్నం సినిమా ‘ఓకే కణ్మణి’ని ‘ఓకే బంగారం’గా తెలుగులోకి తెచ్చిన దిల్ రాజు.. ఈ సమ్మర్లో ‘తెరి’ని ‘పోలీస్’గా రిలీజ్ చేశాడు. తాజాగా ఆయన శివకార్తికేయన్ హీరోగా తెరకెక్కిన ‘రెమో’ను తెలుగులో అందిస్తున్న సంగతి తెలిసిందే. ఈ సినిమాను దిల్ రాజు చాలా ప్రతిష్టాత్మకంగా తీసుకుంటున్నాడు. ‘రెమో’ కర్టెన్ రైజర్ పేరుతో కొన్ని రోజుల కిందట పెద్ద ఫంక్షన్ చేసిన రాజు.. ఆడియో వేడుక కూడా భారీ లెవెల్లోనే ప్లాన్ చేశాడు. మంగళవారమే హైదరాబాద్ లో భారీ ఎత్తున ఈ వేడుక జరగనుంది.

తెలుగులో చాలా ఈవెంట్ మేనేజ్మెంట్ కంపెనీలుండగా.. ముంబయి నుంచి ఓ కంపెనీకి ఈ ఫంక్షన్ చేసే బాధ్యతలు అప్పగించారు. ఈ వేడుక కోసం బడ్జెట్ కూడా భారీగానే పెడుతున్నారు. స్టార్ హీరోయిన్ సమంతతో పాటు కొందరు ప్రముఖులు ఈ వేడుకకు రానున్నారు. ఐతే ‘రెమో’ సినిమా తమిళంలో ఓ మోస్తరుగా ఆడింది. పైగా శివకార్తికేయన్ మన ప్రేక్షకులకు పరిచయం కూడా లేదు. మరి ‘రెమో’ సినిమాకు తెలుగులో ఏమాత్రం కలెక్షన్లు వస్తాయన్నది సందేహమే. మరి అలాంటి సినిమాకు ఈ రేంజిలో ప్రమోషన్ చేస్తుండటం.. ఇంత ఖర్చు పెడుతుండటం ఆశ్చర్యం కలిగించే విషయమే. ఖర్చు విషయంలో చాలా జాగ్రత్తగా ఉండే దిల్ రాజు.. ఈ సినిమా విషయంలో చూపిస్తున్న ఇంట్రెస్ట్ చిత్రంగా అనిపిస్తోంది. బహుశా శివకార్తికేయన్ కు తెలుగులో మార్కెట్ తేవడానికి తమిళ నిర్మాతలే ఫినాన్షియల్ బ్యాకప్ ఇస్తున్నారేమో!

Like Us on Facebook : https://www.facebook.com/Tupakidotcom/