ఆ సినిమా ఫలితంపై దిల్ రాజు టెన్షన్

‘అరవింద సమేత’ సినిమాపై చాలా మంది చాలా ఆశలతో ఉన్నారు. ఎన్టీఆర్ ఈ సినిమాతో రికార్డులు బద్దలు కొట్టే విజయాన్ని ఖాతాలో వేసుకోవాలనుకుంటున్నాడు. దర్శకుడు త్రివిక్రమ్ శ్రీనివాస్.. నిర్మాత రాధాకృష్ణ ‘అజ్ఞాతవాసి’ తాలూకు చేదు అనుభవాల్ని ఇది చెరిపేస్తుందని ఆశిస్తున్నారు. మరోవైపు పూజా హెగ్డే ఇది తనకు తెలుగులో తొలి విజయాన్ని అందిస్తుందని కోరుకుంటోంది. వీళ్లందరూ ఈ సినిమా ఫలితం కోసం ఉత్కంఠగా ఎదురు చూస్తున్నారు. ఐతే వీరితో పాటు ఓ బయటి వ్యక్తి కూడా ఇంతే ఉత్కంఠతో ఉన్నాడు. ఆయనే దిల్ రాజు. ‘అరవింద సమేత’ ఫలితం ఆయనకూ చాలా కీలకం. ఈ సినిమా బ్లాక్ బస్టర్ టాక్ తెచ్చుకుంటే ఆయనకు చాలా కష్టమవుతుంది. ఎందుకంటే ‘అరవింద సమేత’ వచ్చిన వారానికే రాజు సినిమా ‘హలో గురూ ప్రేమ కోసమే’ రిలీజవుతోంది.

తన సినిమా వస్తోంది కాబట్టి ‘అరవింద సమేత’ ఆడకూడదని కోరుకునే రకం కాదు రాజు. ఆయనా ఇండస్ట్రీలో ఒక పెద్ద నిర్మాత. మరో సినిమా పోయి తనది ఆడాలని అనుకోడు. కాకపోతే ‘అరవింద సమేత’పై ఉన్న అంచనాలు ఆయన్ని ఒకింత కలవరానికి గురి చేస్తూనే ఉంటాయి. ఈ సినిమాకు బ్లాక్ బస్టర్ టాక్ వచ్చి.. దసరా సెలవుల్లో ప్రభంజనం సాగిస్తే ‘హలో గురూ ప్రేమ కోసమే’కు కష్టాలు తప్పవు. రాజు ట్రాక్ రికార్డు ఈ మధ్య ఏమీ బాగా లేదు. ఈ ఏడాది ‘లవర్’.. ‘శ్రీనివాస కళ్యాణం’ లాంటి డిజాస్టర్లు ఖాతాలో వేసుకున్నారాయన. పైగా ‘హలో గురూ ప్రేమ కోసమే’ ట్రైలర్ చూస్తే సాదాసీదాగా కనిపించింది. ఏమంత కొత్తదనం లేదు. ఈ రోజుల్లో ప్రోమోలు కొత్తగా లేకుంటే ఓపెనింగ్స్‌ పై ప్రభావం పడుతోంది. ఈ నేపథ్యంలో ‘హలో గురూ ప్రేమ కోసమే’ను జనాలు ఎలా రిసీవ్ చేసుకుంటారో అన్న టెన్షన్ రాజు అండ్ కోలో ఉంది. ఐతే అంతకంటే ముందు ‘అరవింద సమేత’ టాక్ కోసం ఆయన ఉత్కంఠగా ఎదురు చూస్తున్నారు.