షారుఖ్ దెబ్బకు వాళ్లేమవుతారో?

అసలే వంద కోట్లకు పైగా బడ్జెట్ గా తీస్తున్న సినిమా. పైగా ఎంతో రిస్క్ తో కూడుకున్న చారిత్రక కథాంశంతో తెరకెక్కుతోంది. హీరో పెద్ద స్టార్ ఏమీ కాదు. దర్శకుడికి మంచి పేరుంది కానీ.. ఆయన గత సినిమాలు పెద్దగా ఆడలేదు. మరి ఈ నేపథ్యంతో వస్తున్న సినిమా.. షారుఖ్ లాంటి మెగా స్టార్ నటిస్తున్న క్రేజీ మూవీతో పోటీ పడితే ఎలా ఉంటుంది? ఇది చాలా చాలా పెద్ద రిస్క్ అని ఎందరు హెచ్చరిస్తున్నా ‘బాజీరావ్ మస్తానీ’ టీమ్ వెనక్కి తగ్గట్లేదు. షారుఖ్ మూవీ ‘దిల్ వాలే’కు పోటీగా డిసెంబరు 18నే తమ సినిమాను కూడా రిలీజ్ చేయడానికి రెడీ అవుతోంది.

సంజయ్ లీలా బన్సాలీ దర్శకత్వంలో రణవీర్ సింగ్ - దీపికా పదుకొనే - ప్రియాంక చోప్రా ముఖ్య పాత్రల్లో నటించిన ‘బాజీరావ్ మస్తానీ’ వంద కోట్లకు పైగా బడ్జెట్ తో తెరకెక్కిన సినిమా. హిందీలో చారిత్రక నేపథ్యంతో తెరకెక్కిన సినిమాలు పెద్దగా ఆడింది లేదు. అయినా బన్సాలీ పెద్ద రిస్కే చేశాడు. ఐతే సినిమా మీద ఆయనకు ఎంత కాన్ఫిడెన్స్ ఉన్నప్పటికీ .. రిలీజ్ విషయంలో కాస్త ముందు వెనుక చూసుకోవాలి కదా. అందులోనూ ‘దిల్ వాలే’ ట్రైలర్ రాకముందు వరకు పరిస్థితి వేరు. కానీ ఆ ట్రైలర్ చూశాక అంచనాలు అమాంతం పెరిగిపోయాయి. ఇందులో కాజోల్ తో షారుఖ్ కెమిస్ట్రీ.. రోహిత్ శెట్టి టేకింగ్ అదీ చూస్తుంటే.. బ్లాక్ బస్టర్ ఖాయమన్న అంచనాలతో ఉన్నారు జనాలు.

సినిమా కోసం ఎప్పుడెప్పుడా అని ఎదురు చూస్తున్నారు. మరి ఇంత ఆసక్తి ఉన్న సినిమాకు పోటీగా వస్తున్న ‘బాజీరావ్ మస్తానీ’ ఏమవుతుందో?