తేజు హీరో.. బాబీ ప్రొడ్యూసర్

టాలీవుడ్లో చాలామంది దర్శకులు ఒక దశ దాటాక నిర్మాతలు అయిన వాళ్లే. ప్రస్తుతం అగ్ర దర్శకులుగా హవా నడిపిస్తున్న రాజమౌళి, సుకుమార్, త్రివిక్రమ్ శ్రీనివాస్.. ఇలా చాలామంది నిర్మాతలుగా అదృష్టాన్ని పరీక్షించుకున్నవాళ్లే. ఈ కోవలోకి మరో దర్శకుడు చేరుతున్నాడు. అతనే.. కె.ఎస్.రవీంద్ర అలియాస్ బాబీ. ‘పవర్’ సినిమాతో దర్శకుడిగా పరిచయం అయిన బాబీ.. ఆ తర్వాత ‘సర్దార్ గబ్బర్ సింగ్’, ‘జై లవకుశ’ సినిమాలు తీశాడు. ప్రస్తుతం వెంకటేష్-నాగచైతన్య కాంబినేషన్లో ‘వెంకీ మామ’ చేస్తున్నాడు. త్వరలోనే అతను నిర్మాతగా ఒక సినిమా మొదలు కానుంది. అందులో మెగాస్టార్ మేనల్లుడు సాయిధరమ్ తేజ్ హీరోగా నటిస్తాడట. ఐతే ఈ చిత్రానికి దర్శకుడెవరో తెలిస్తే ఆశ్చర్యపోవాల్సిందే.

ఈ వారం ప్రేక్షకుల ముందుకు వస్తున్న సప్తగిరి సినిమా ‘వజ్ర కవచధర గోవింద’కు దర్శకత్వం వహించిన అరుణ్ పవార్.. బాబీ నిర్మాణంలో తేజు హీరోగా సినిమా చేయబోతున్నాడట. ‘బెస్ట్ యాక్టర్స్’ అనే చిన్న సినిమాతో దర్శకుడిగా పరిచయం అయిన అతను.. ఆ తర్వాత సప్తగిరిని హీరోగా పరిచయం చేస్తూ ‘సప్తగిరి ఎక్స్‌ప్రెస్’ తీశాడు. తర్వాత మళ్లీ సప్తగిరితోనే ఇంకో సినిమా చేశాడు. ఐతే అతడి రేంజికి తేజుతో సినిమా అంటే కొంత ఆశ్చర్యం కలిగించే విషయమే. తేజు ఎంత ఫ్లాపుల్లో ఉన్నప్పటికీ ఇప్పటిదాకా ఒక స్థాయి ఉన్న దర్శకులతోనే సినిమాలు చేస్తున్నాడు. ప్రస్తుతం అతను మారుతి దర్శకత్వంలో ఓ సినిమాను మొదలుపెడుతున్నాడు. గీతా ఆర్ట్స్ లాంటి పెద్ద సంస్థలో ఆ సినిమా తెరకెక్కనుంది. అలాంటి హీరో చిన్నా చితకా సినిమాలు తీసిన అరుణ్ పవార్‌తో సినిమాకు ఓకే అన్నాడంటే ఆశ్చర్యం కలుగుతోంది.