బిగ్‌ బాస్‌ లో అంత పెద్ద స్టారా?

సౌత్‌ లో బిగ్‌ బాస్‌ ను జనాలు బాగానే ఆధరిస్తున్నారు. తెలుగు మరియు తమిళంలో ఇప్పటికే రెండు సీజన్‌ లు పూర్తి చేసుకున్న బిగ్‌ బాస్‌ మూడవ సీజన్‌ కు సిద్దం అయ్యింది. తమిళ బిగ్‌ బాస్‌ కు అంతా సిద్దం అయ్యింది. కమల్‌ హాసన్‌ మూడవ సీజన్‌ కు కూడా హోస్టింగ్‌ చేయబోతున్నాడు. తెలుగులో హోస్ట్‌ సమస్య ఉండగా తమిళంలో మాత్రం అలాంటి సమస్య లేకపోవడంతో ఇక్కడ కంటే అక్కడ త్వరగా ప్రారంభం కాబోతుంది. పార్టిసిపెంట్స్‌ విషయంలో కూడా తుది నిర్ణయానికి రావడం జరిగిందట.

తమిళ బిగ్‌ బాస్‌ లో ఈసారి సెలబ్రెటీలు షో పై ఆసక్తిని కలిగిస్తున్నాయి. గతంతో పోల్చితే ఈసారి పార్టిసిపెంట్స్‌ మరింత ప్రముఖమైన వ్యక్తులుగా తమిళ మీడియాలో కథనాలు వస్తున్నాయి. గత కొన్ని రోజులుగా ప్రముఖంగా వినిపిస్తున్న వార్త ప్రకారం తమిళ బిగ్‌ బాస్‌ లో ప్రముఖ దర్శకుడు చేరన్‌ కూడా పార్టిసిపెంట్‌ గా ఉండబోతున్నాడు. తమిళ సినీ ప్రేక్షకులతో పాటు తెలుగు ప్రేక్షకులకు కూడా సుపరిచితుడు చేరన్‌. తమిళంలో క్లాసిక్‌ మూవీ అయిన నా ఆటోగ్రాఫ్‌ మూవీని తెరకెక్కించింది ఈయనే.

ఈయన బిగ్‌ బాస్‌ లో ఉండబోతున్న నేపథ్యంలో అంతా కూడా చాలా ఆసక్తిగా షో గురించి చర్చించుకుంటున్నారు. బిగ్‌ బాస్‌ లో చేరన్‌ ఉండటం వల్ల షో కు హుందాతనం వస్తుందని.. ప్రేక్షకాధరణ కూడా ఎక్కువగా ఉంటుందని ఈ సందర్బంగా తమిళ సినీ వర్గాల వారు అభిప్రాయం వ్యక్తం చేస్తున్నారు. కోలీవుడ్‌ లో ఒక గొప్ప దర్శకుడిగా పేరున్న చేరన్‌ బిగ్‌ బాస్‌ లో పాల్గొనబోతున్న నేపథ్యంలో అక్కడ పరిస్థితులు ఎలా ఉంటాయో అనేది చూడాలి. మరి కొన్ని రోజుల్లోనే తమిళ బిగ్‌ బాస్‌ ప్రారంభం కాబోతుంది.

ఇక తెలుగు బిగ్‌ బాస్‌ సీజన్‌ 3 కి కూడా అతి త్వరలోనే ప్రారంభం అయ్యే అవకాశాలు కనిపిస్తున్నాయి. విశ్వసనీయంగా అందుతున్న సమాచారం ప్రకారం జులై రెండవ వారంలోనే బిగ్‌ బాస్‌ తెలుగు సీజన్‌ 3 ప్రారంభం అవ్వబోతుంది. ఇక బిగ్‌ బాస్‌ సీజన్‌ 3 కి హోస్ట్‌ గా నాగార్జున వ్యవహరించబోతున్నాడనే వార్తలు వస్తున్నాయి.