ఆ దర్శకుడి దెబ్బకు భయపడిపోయిన హీరో

ఈ ఏడాది చివరల్లో విడుదల కానున్న మూవీ అర్జున ఫల్గుణ. యూత్ ఫుల్ హీరో శ్రీవిష్ణు.. హీరోయిన్ అమృతా అయ్యర్ నటించిన ఈ తాజా చిత్రానికి దర్శకుడిగా తేజ మార్ని పని చేశారు. ఈ వారం విడుదలయ్యే సినిమాలు ఐదారు ఉన్నప్పటికీ.. కాస్తంత బజ్ ఉన్న మూవీ మాత్రం అర్జున ఫల్గుణ. సింఫుల్ బడ్జెట్ తో.. వైవిధ్యమైన కథాంశంతో సినిమాలు తీసే శ్రీవిష్ణు చిత్రమన్నంతనే కొన్ని అంచనాలు ఉంటాయి. ఎప్పటికప్పుడు వాటిని మిస్ కాకుండా ఉండేలా జాగ్రత్తలు తీసుకోవటం కనిపిస్తుంది.

రోటీన్ కు భిన్నంగా ఉండే ఈ మూవీ టైటిల్ ఆసక్తిని క్రియేట్ చేస్తోంది. పూర్తిగా గోదావరి యాసలో ఉండే ఈ సినిమాలో గోదారోళ్ల ఎటకారాన్ని బాగా వాడేసినట్లు చెబుతున్నారు. అన్నింటికి మించిన ఈ సినిమాను అంచనాకు మించి ముందే పూర్తి చేసిన క్రెడిట్ పూర్తిగా దర్శకుడిదేనని చెబుతున్నారు. కేవలం 55 రోజుల్లో సినిమాను పూర్తి చేయటం ద్వారా తనకే షాకిచ్చినట్లు హీరో శ్రీవిష్ణు చెప్పారు.

తన సినిమాల్లో కొత్త ప్రయోగాలు పెద్దగా చేయనని.. కాకుంటే మామూలు కథనే కాస్త కొత్తగా చెప్పేందుకు ప్రయత్నిస్తుంటానని చెప్పారు. ఈ సినిమా ఎన్టీఆర్ అభిమానిగా హీరో దర్శనమిస్తాడు. ఎన్టీఆర్ గురించి గొప్పగా చెప్పుకునే అవకాశం ఈ సినిమాతో వచ్చినట్లు చెప్పారు.

ఎమోషన్ సీన్స్ బాగా వచ్చాయని.. ఎమోషన్ ను చక్కగా హ్యాండిల్ చేస్తే సినిమా వర్కవుట్ అవుతుందని.. అందుకే సినిమాను తాను ఓకే చేసినట్లు చెప్పారు. ఈ సినిమా మొత్తం గోదావరి జిల్లాల్లోనే సాగిందని.. ఇది మా గోదావరి జిల్లాల గొప్పతనమని సినిమా చూసిన గోదారి జిల్లాల వారంతా కాలర్ ఎగరేసి చెప్పుకుంటారే నమ్మకం తనకుందన్నాడు.

మాస్ సినిమాలు తనకు సెట్ కావని.. లవ్ స్టోరీలు.. కామెడీలాంటి వాటిల్లో నటించమని తన స్నేహితులు సలహాలు ఇస్తుంటారని.. మాస్ సినిమాలకు తాను పనికి వస్తానో లేదన్న విషయాన్ని డిసెంబరు 31న చూసి చెప్పమని శ్రీవిష్ణు చెప్పటం చూస్తే.. అతడి కాన్ఫిడెంట్ ఎంతన్నది ఇట్టే అర్థమైపోతుంది. ఖాళీ చేతులతో ఇండస్ట్రీలో అడుగు పెట్టానని.. ఇప్పుడు కోట్ల రూపాయిల కంటే విలువైన ఆస్తి తాను పరిచయం చేసిన దర్శకులేనని కాస్తంత కొత్త మాట చెప్పాడు. ఏడాది చివర్లో వస్తున్న ఈ మూవీ మంచి ముగింపుగా మారుతుందన్న మాటను చెబుతున్నారు. అదెంత వరకు నిజమో.. మరో రోజులో తేలనుంది.