పవన్ చివరి సినిమా ఆ దర్శకుడికా?

పవన్ కళ్యాణ్ తో ఓ సినిమా చేయడం.. ఏ దర్శకుడికి అయినా డ్రీమ్ అని చెప్పాల్సిందే. తన స్టార్ పవర్ తోనే లక్షల మందిని థియేటర్లకు రాబట్టగల సత్తా పవర్ స్టార్ సొంతం. అలాగే.. అన్ని కోట్ల మంది అంచనాలను అందుకునేలా సినిమా చేయడం అన్న పాయింట్ కూడా డైరెక్టర్లను చాలా ఎగ్జయిట్ చేస్తుంది.

కానీ ప్రస్తుతం రాజకీయాలపై దృష్టి సారించిన పవన్ కళ్యాణ్.. ఇక ఎన్ని సినిమాలు చేస్తాడన్నది సందేహమే. మరో ఏడాదిన్నరలో ఎన్నికలు రాబోతోన్న తరుణంలో వీలైనంతగా సమయాన్ని జనసేన కోసం కేటాయించాలని పవన్ చూస్తున్నాడు. అయితే.. ప్రస్తుతం త్రివిక్రమ్ తో మూవీ పూర్తి చేసిన తర్వాత.. మరొక్క సినిమా చేయాలని భావిస్తున్నాడట పవర్ స్టార్. అంటే పవన్ 26.. కనీసం ఎన్నికల వరకూ అయినా పవర్ స్టార్ కు చివరది అని చెప్పాల్సిందే. ఇది పొలిటికల్ టచ్ తో జనాలను జనసేనవైపు ఆకట్టుకునేలా ఉండాలన్నది పవన్ టార్గెట్ అని తెలుస్తోంది. పైగా వీలైనంత త్వరగా సినిమా కంప్లీట్ చేయగలగాలి.

అటు పొలిటికల్ మూవీ.. ఇటు త్వరగా పూర్తి చేయడం.. ఈ రెండు క్వాలిటీస్ ఉన్న దర్శకుడు క్రిష్ మాత్రమే అని పవన్ క్యాంప్ విశ్వసిస్తున్నట్లుగా టాలీవుడ్ లో టాక్ వినిపిస్తోంది. నిజానికి వేదాలం రీమేక్ లో పవన్ చేస్తాడని అన్నారు. పూజా కార్యక్రమాలు కూడా జరిగాయి. ఆ తర్వాత సంతోష్ శ్రినివాస్ డైరెక్షన్ లో ఓ డైరెక్ట్ మూవీ చేయనున్నాడనే టాక్ కూడా వచ్చింది. ఇప్పుడు ఇవేమీ కాకుండా.. క్రిష్ తో ఓ పొలిటికల్ సబ్జెక్ట్ ప్లాన్ చేయాలని చూస్తున్నట్లు టాక్.