కుదిరితే నాని .. లేదంటే శర్వానంద్!

యువతరం దర్శకులలో మారుతికి మంచి క్రేజ్ ఉంది. యూత్ ను .. ఫ్యామిలీ ఆడియన్స్ ను థియేటర్స్ కి రప్పించాలంటే, ఒక కథలో ఎలాంటి అంశాలు ఉండాలనేది ఆయనకి బాగా తెలుసు. ముందుగా కొన్ని సినిమాలకి రచయితగా పనిచేసి రావడం వలన, కథాకథనాలపై మారుతికి మంచి పట్టు ఉంది. తన సినిమాలకి తనే కథ .. స్క్రీన్ ప్లే .. మాటలు సమకూర్చుతాడు. అందువలన పాత్రల స్వరూప స్వభావాల విషయంలో ఆయనకి పూర్తి క్లారిటీ ఉంటుంది.

ఒక కథకి కావలసిన కమర్షియల్ హంగులను తీసుకురావడం ఎలాగో, ప్రేక్షకులను నాన్ స్టాప్ గా ఎంటర్టైన్ చేయడం ఎలాగో ఆయనకి బాగా తెలుసు. ఇంతవరకూ ఆయన చేసిన సినిమాల్లో 'భలే భలే మగాడివోయ్' .. 'మహానుభావుడు' ముందువరుసలో కనిపిస్తాయి. 'భలే భలే మగాడివోయ్' సినిమా నాని కెరియర్లో చెప్పుకోదగినదిగా నిలిస్తే, 'మహానుభావుడు' శర్వానంద్ కెరియర్లో ఎప్పటికీ గుర్తుండిపోతుంది. కథను .. పాత్రలను మారుతి తీర్చిదిద్దిన తీరు అందుకు ప్రధానమైన కారణంగా చెప్పుకోవాలి.

అప్పటి నుంచి కూడా మారుతి - నాని కాంబినేషన్లో సినిమా రావాలని నాని అభిమానులు కోరుకుంటున్నారు. శర్వానంద్ అభిమానులు కూడా అదే విధంగా ఆశిస్తున్నారు. ఈ నేపథ్యంలోనే మారుతి నానీని దృష్టిలో పెట్టుకుని ఒక కథ .. శర్వానంద్ కోసం ఒక కథను సిద్ధం చేస్తున్నాడట. ఇప్పటికే ఈ కథలపై చాలావరకూ కసరత్తులు పూర్తయ్యాయని చెప్పుకుంటున్నారు. త్వరలోనే నానీ .. శర్వానంద్ లకు ఆ కథలను వినిపించాలనీ, ఎవరు ఓకే అంటే వాళ్లతో ముందుగా సెట్స్ పైకి వెళ్లాలని మారుతి అనుకుంటున్నాడట. ఇందులో వాస్తవమెంతన్నది చూడాలి మరి.