ప్రభాస్ తో సినిమా.. మారుతి పిచ్చ క్లారిటీ

యంగ్‌ రెబల్‌ స్టార్‌ ప్రభాస్ తో మారుతి ఒక సినిమా చేయబోతున్నాడు అనేది గత కొన్ని నెలలుగా వస్తున్న వార్త. ఈ విషయమై ఇప్పటి వరకు దర్శకుడు మారుతి ఒక్కసారి అంటే ఒక్క సారి కూడా నోరు విప్పలేదు. కనీసం సినిమా ఎప్పుడు.. ఏంటీ అనే విషయం లో క్లారిటీ ఇవ్వలేదు. అయినా కూడా రాజా డీలక్స్ అని... అప్పుడు అని.. ఇప్పుడు అని.. ముగ్గురు హీరోయిన్స్ అని వార్తలు పెద్ద ఎత్తున జోరుగా వస్తున్నాయి.

దర్శకుడు మారుతి ఎట్టకేలకు ప్రభాస్‌ తో మూవీ విషయంలో ఒక స్పష్టత అయితే ఇస్తూ వ్యాఖ్యలు చేశాడు. పక్కా కమర్షియల్‌ సినిమా విడుదల నేపథ్యంలో ఆ సినిమా ప్రమోషన్ కోసం ఒక ఇంటర్వ్యూ ఇచ్చాడు. ఆ ఇంటర్వ్యూ సందర్బంగా సదరు ఇంటర్వ్యూ చేసిన వ్యక్తి ప్రభాస్ తో సినిమా అంటున్నారు ఎప్పుడు ఉంటుంది.. ఏంటి అంటూ ప్రశ్నించగా ఇప్పుడు దాని గురించి స్పందించేందుకు సమయం కాదు అంటూ మారుతి దాటవేసే ప్రయత్నం చేశాడు.

సదరు జర్నలిస్ట్‌ మాత్రం చిన్న ఇన్ఫర్మేషన్ అయినా ఇవ్వండి అంటూ అడగడంతో మారుతి స్పందించాడు. ప్రభాస్ ను ఒక ప్రాజెక్ట్ గురించి కలిసింది నిజమే.. ఆయనతో ఒక సినిమా చేయబోతున్నాను. అయితే ఇప్పటి వరకు అది చర్చల దశలోనే ఉంది. డార్లింగ్‌.. బుజ్జిగాడు వంటి యాక్టివ్‌ ప్రభాస్ ను నేను చూపించాలని కోరుకుంటున్నాను. తప్పకుండా ఆయనతో అలాంటి ఒక సినిమాను చేస్తాను అనే నమ్మకం ఉంది.

ప్రస్తుతానికి చర్చలు అయితే జరుగుతున్నాయి కాని అంతకు మించి ఎలాంటి అప్డేట్‌ లేదు అన్నట్లుగా మారుతి ప్రకటించాడు. తాము చర్చలు జరుపుతున్న సమయంలో మా చుట్టు వంద మంది ఉంటారు. వారిలో ఎవరి ద్వారానో ఒకరి ద్వారా ఈ విషయం బయటకు రావడం.. అది కాస్త మీడియాకు చేరడం ఒకటికి రెండు కథనాలు రాస్తూ బయటకు వస్తున్నాయి. అంతే తప్ప ఇప్పటి వరకు సినిమా గురించి కేవలం చర్చలు మాత్రమే జరుగుతున్నాయని మారుతి చెప్పుకొచ్చాడు.

గోపీ చంద్‌ మరియు రాశిఖన్నా జంటగా నటించిన పక్కా కమర్షియల్‌ సినిమా తో మారుతి త్వరలో రాబోతున్నాడు. ఆ సినిమా విజయం సాధిస్తే తప్పకుండా మారుతి మరియు ప్రభాస్ ల కాంబో మూవీ ఉంటుందని విశ్లేషకులు అభిప్రాయం వ్యక్తం చేస్తున్నారు. కేవలం రెండు నెలల్లో ప్రభాస్ తో సినిమా ను చేసేందుకు మారుతి ప్లాన్ చేశాడని కూడా వార్తలు వచ్చాయి. ఆ విషయం లో నిజం ఎంత అనేది ప్రారంభం అయితే కాని క్లారిటీ రాదు.