సినిమా ఆడలేదు.. అయినా సీక్వెల్ తీస్తాడట

టీవీ యాంకర్ గా ప్రస్థానం మొదలుపెట్టి.. ఆ తర్వాత సినిమాల వైపు అడుగులేశాడు ఓంకార్. తొలి ప్రయత్నంలో అతను తీసిన ‘జీనియస్’ నిరాశ మిగిల్చినా ‘రాజు గారి గది’ చాలా మంచి ఫలితాన్ని అందించింది. ఈ ఊపులో అక్కినేని నాగార్జున లాంటి స్టార్ హీరోతో ‘రాజు గారి గది-2’ తీసే అవకాశం అందుకున్నాడు ఓంకార్. ఐతే ఈ చిత్రం అంచనాల్ని అందుకోలేకపోయింది. ఓ మోస్తరుగా ఆడి వెళ్లిపోయింది. ఈ సినిమా ఆశించిన ఫలితాన్నివ్వని నేపథ్యంలో ఇక ఈ సిరీస్ కు తెర పడిపోతుందని అంతా అనుకున్నారు. కానీ ఓంకార్ మాత్రం ‘రాజు గారి గది’ సిరీస్ లో మరో సినిమా తీయబోతున్నట్లు ప్రకటించి ఆశ్చర్యపరిచాడు.

‘రాజు గారి గది-2’ తర్వాత తాత్కాలికంగా మెగా ఫోన్ పక్కన పెట్టేసిన ఓంకార్.. తిరిగి బుల్లితెర వైపు అడుగులేశాడు. ‘సిక్త్ సెన్స్’ పేరుతో ఒక వెరైటీ రియాలిటీ షో మొదలుపెట్టాడు. ఈ శనివారమే ఆ షో మొదలైంది. దీని తర్వాత బెల్లంకొండ శ్రీనివాస్ హీరోగా ఓ స్పోర్ట్స్ బేస్డ్ సినిమా తీయడానికి ఓంకార్ సన్నాహాలు చేసుకుంటున్న సంగతి తెలిసిందే. దాని తర్వాత తాను తీయబోయే సినిమా ‘రాజు గారి గది-3’నే అని ఓంకార్ వెల్లడించాడు. ఈ చిత్రం కోసం ఆల్రెడీ స్క్రిప్ట్ వర్క్ మొదలైందని.. పక్కాగా స్క్రిప్టు రెడీ అయ్యాక ఈ సినిమా ఎవరితో చేయాలనేది నిర్ణయించుకుంటానని.. ఆలోపు తన దర్శకత్వంలో వేరే సినిమా వస్తుందని ఓంకార్ తెలిపాడు. ఐతే ‘రాజు గారి గది-2’ సరిగా ఆడని నేపథ్యంలో మూడో భాగంలో చేయడానికి ఏ హీరో ముందుకొస్తాడో చూడాలి.