నటసింహం కోసం స్టార్ కాస్ట్ వేటలో దర్శకుడు!

నటసింహం నందమూరి బాలయ్య.. ప్రస్తుతం మాస్ డైరెక్టర్ బోయపాటి శీనుతో యాక్షన్ సాగా 'అఖండ' చేస్తున్న విషయం తెలిసిందే. షూటింగ్ దశలో ఉన్నటువంటి ఈ సినిమా పై నందమూరి అభిమానులలో భారీ అంచనాలు నెలకొన్నాయి. ఎందుకంటే ఇదివరకు బాలయ్య - బోయపాటి కాంబినేషన్ లో సింహా - లెజెండ్ సినిమాలు భారీ కమర్షియల్ హిట్స్ గా నిలిచాయి. అయితే ప్రస్తుతం ఈ సక్సెస్ ఫుల్ కాంబినేషన్ హ్యాట్రిక్ హిట్ కొడతారని నమ్మకంతో ఉన్నారు ఫ్యాన్స్. ఈ సినిమాలో బాలయ్య డ్యూయెల్ రోల్ చేస్తుండగా త్వరలోనే సినిమాను ప్రేక్షకుల ముందుకు తీసుకొచ్చే ప్లాన్ లో ఉన్నారు మేకర్స్.

ఈ సినిమా తర్వాత బాలయ్య తదుపరి 107వ సినిమా గురించి చర్చలు నడుస్తున్నాయి. ఈ ఏడాది క్రాక్ మూవీతో భారీ హిట్ నమోదు చేసిన గోపీచంద్ మలినేని దర్శకత్వంలో బాలయ్య సినిమా చేయబోతున్నాడు. మైత్రి మూవీ మేకర్స్ వారు భారీ బడ్జెట్ తో కమర్షియల్ సినిమాగా బాలయ్యతో ప్లాన్ చేశారు. ఆ సినిమాకోసం దర్శకుడు గోపిచంద్ మలినేని మంచి మాస్ అంశాలతో స్క్రిప్ట్ సిద్ధం చేస్తున్నట్లు తెలుస్తుంది. ప్రస్తుతం దర్శకుడు గోపీ బాలయ్య స్క్రిప్ట్ పనులలో బిజీగా ఉండగా.. సినిమా పల్నాటి ఫ్యాక్షన్ నేపథ్యంలో బాలయ్య పోలీస్ ఆఫీసర్ గా కనిపించనున్నట్లు టాక్.

అఖండ మూవీ పూర్తికాగానే గోపితో సినిమా పట్టాలెక్కుతుంది. అయితే ప్రస్తుతం ఈ సినిమాలో బాలయ్య సరసన నటించబోయే హీరోయిన్ ఎవరినేది తెలియాల్సి ఉంది. కానీ యాక్ట్రెస్ వరలక్ష్మి శరత్ కుమార్ మాత్రం ఆల్రెడీ ఓ క్యారెక్టర్ కోసం సెలక్ట్ అయిపోయింది. అధికారికంగా ప్రకటన కూడా బయటికి వచ్చేసింది. ఇప్పుడు మరికొందరు స్టార్ యాక్టర్స్ లైన్ లో పెడుతున్నారట మేకర్స్. గోపీచంద్ మలినేని సినిమా అంటే క్రాక్ సినిమాతో మంచి అంచనాలు క్రియేట్ చేసుకున్నాడు. బాలయ్య కోసం స్టార్ కాస్ట్ సెట్ చేస్తున్నట్లు తెలుస్తుంది. ఈ సినిమాకు తమన్ సంగీతం అందిస్తున్నాడు. చూడాలి మరి బాలయ్య సరసన హీరోయిన్ - ఇతర తారాగణం ఎవరు రాబోతున్నారో..!