పోయిన సినిమాకు సీక్వెల్ ఎందుకో

దర్శక దిగ్గజం శంకర్ ఎంత గొప్ప క్లాసిక్స్ తీసినప్పటికీ ఆయనకూ కొన్ని చేదు జ్ఞాపకాలు తప్పలేదు . అందులో ముఖ్యంగా చెప్పుకోవాల్సినవి మూడు. ఒకటి స్నేహితుడు రెండు ఐ మిగిలింది బాయ్స్. తాజాగా బాయ్స్ కి సీక్వెల్ తీసే ఆలోచన జరుగుతున్నట్టు వార్త చక్కర్లు కొడుతుండటంతో శంకర్ కొత్తగా ఆలోచించకుండా ఇలా సీక్వెల్స్ వెనుక పడ్డాడేమిటా అని అభిమానులు ఆశ్చర్యపోతున్నారు. బాయ్స్ వచ్చి 16 ఏళ్ళు దాటింది . ఇప్పుడు దానికి కొనసాగింపు అంటే సరైన ఆలోచన కాదు.

అప్పుడు యూత్ గా దీన్ని ఎంజాయ్ చేసినవాళ్ళు ఇప్పుడు మిడిల్ ఏజ్ కు వచ్చేశారు. దానికి తోడు అందులో ఉన్న యాక్టర్స్ ని తిరిగి సెట్ చేసుకోవడం అంత ఈజీ కాదు. ఇదంతా పక్కన పెడితే బాయ్స్ అసలు బ్లాక్ బస్టర్ మూవీ ఏమి కాదు. ఒక్క ఏఆర్ రెహమాన్ సంగీతం మాత్రమే అప్పట్లో చార్ట్ బస్టర్ గా నిలిచి యువత నోళ్ళల్లో మెదళ్లలో ఇవే పాటలు గింగిరాలు తిరిగేలా చేసింది. అది మినహాయిస్తే బాయ్స్ తమిళ్ లో ఫ్లోప్ కాగా తెలుగులోనే అంతో ఇంతో బెటర్ గా ఆడింది.

ఇది ఖచ్చితంగా శంకర్ రేంజ్ సినిమా కాదని ఫ్యాన్స్ ఇప్పటికీ చెబుతారు. అలాంటిది ఇప్పుడు దీనికి సీక్వెల్ అంటేనే నమ్మలేని విషయం. పైగా ఒక పక్క భారతీయుడు 2 ముందుకు సాగుతుందా లేదా అనే అనుమానాల మధ్యే షూటింగ్ గురించి సరైన అప్ డేట్స్ రావడం లేదు. ఒకసారి ఉంటుందని మరొకసారి లేదని ఇలా అయోమయం కొనసాగుతోంది. ఇది చాలదన్నట్టు ఇప్పుడీ బాయ్స్ గోల. అయినా నిజంగా సీక్వెల్ తీసుకోవాలని ఉంటే ఒకే ఒక్కడు ప్రేమికుడు జెంటిల్ మెన్ లాంటి మాస్టర్ పీసులు ఉండగా ఈ బాయ్సే దొరికిందా అంటున్న వాళ్ళు లేకపోలేదు. అయితే శంకర్ ఇకనైనా వర్క్ అవుట్ కాని ఈ సీక్వెల్స్ ఆలోచనలు మానేసి తన స్థాయికి తగ్గట్టు సోషల్ మెసేజ్ తో కూడిన కొత్త సబ్జెక్టుల వైపు దృష్టి సారిస్తే బెటర్