మెగాస్టార్ - శంకర్ కాంబో.. నిజమేనా??

మెగాస్టార్ చిరంజీవి ప్రస్తుతం భారీ బడ్జెట్లో తెరకెక్కుతున్న పీరియడ్ చిత్రం 'సైరా'లో నటిస్తున్నాడు. సురేందర్ రెడ్డి దర్శకత్వంలో తెరకెక్కుతున్న ఈ సినిమా ప్రస్తుతం చివరిదశలో ఉంది. ఈ సినిమా పూర్తి కాగానే మెగాస్టార్ తన నెక్స్ట్ సినిమాను కొరటాల శివ దర్శకత్వంలో చేస్తాడు. ఈ ప్రాజెక్టులే కాకుండా త్రివిక్రమ్ దర్శకత్వంలో ఒక సినిమా చేస్తున్నానని 'వినయ విధేయ రామ' ప్రీ రిలీజ్ ఈవెంట్ లో చిరు స్వయంగా వెల్లడించిన సంగతి తెలిసిందే. ఈ ప్రాజెక్టుల వరస ఇలా ఉంటే తాజాగా ఈ సినిమాలను తలదన్నే రీతిలో మరో భారీ ప్రాజెక్ట్ లైన్లో ఉందని ఫిలిం నగర్లో ప్రచారం సాగుతోంది.

తమిళ స్టార్ డైరెక్టర్ శంకర్ దర్శకత్వంలో మెగాస్టార్ చిరంజీవి హీరోగా ఒక సినిమాను తెరకెక్కించేందుకు ప్రయత్నాలు మొదలయ్యాయట. ఈ సినిమాను మెగా ప్రొడ్యూసర్ అల్లు అరవింద్ ప్లాన్ చేస్తున్నాడనే గుసగుసలు కూడా వినిపిస్తున్నాయి. మరి ఈ ప్రచారంలో ఎంతమాత్రం నిజముందో తెలియదు కానీ ఒకవేళ నిజమైన పక్షంలో మెగా ఫ్యాన్స్ ఆనందానికి అవధులే ఉండవు. చిరంజీవి- శంకర్ కాంబినేషన్ కంటే క్రేజీ కాంబో ఇంకేముంటుంది చెప్పండి? ఇదే వార్తే నిజమైతే ఈ సినిమా సంచలనాలకు కేర్ ఆఫ్ అడ్రెస్ అవుతుందని చెప్పడం లో సందేహం లేదు.

కానీ అటు మెగా కాంపౌండ్ వర్గాలు కానీ ఇటు శంకర్ కానీ దీనిని ధృవీకరించేవరకూ రూమర్ గానే పరిగణించాల్సి ఉంటుంది. శంకర్ ప్రస్తుతం కమల్ హాసన్ హీరోగా 'భారతీయుడు 2' సినిమాను రూపొందిస్తున్నాడు.