దేవిశ్రీప్రసాద్‌.. ఇదొక సినిమా పేరు

వీళ్ల ముగ్గురి కాంబినేషన్లో ఒక సినిమా వస్తుందని అనుకుంటున్నారా? అబ్బే కాదుగా. ''ఇదేగా ఆశ పడ్డావ్ బాల-కృష్ణ'' అనే టైటిల్‌ గుర్తుందా? ''ఆవు పులి మధ్యలో ప్రభాస్‌'' అనే సినిమా పేరు తెలుసా? ''బన్నీ అండ్‌ చెర్రీ'' అంటూ ఒక సినిమా వచ్చింది చూశారా? ఈ సినిమాల పేర్లన్నీ ఎలా పెట్టారో ఇప్పుడు కూడా అలాగే ''దేవి శ్రీ ప్రసాద్‌'' అనే ఒక సినిమా టైటిల్‌ను ఒక డైరక్టర్ పెట్టాడు. కథకు సరిపోయే టైటిల్‌ అంటున్నాడు.

సినిమా టైటిల్‌ తోనే అందరినీ కట్టిపాడేయాలి కాబట్టి.. మనోళ్లు ఇలా స్టార్‌ హీరోలు లేదా సెలబ్రిటీల పేరును వాడేసుకుంటుంటారు. అయితే కేవలం ఒకే ఒక్క పేరు వాడకుండా టైటిల్‌ లో ఇంకేదైనా కలిపి సెలబ్రిటీ పేరును వాడితే ఒక విధంగా ఓకె కాని.. ఇలా డైరక్టుగా ''శ్రీదేవి'' ''దేవిశ్రీప్రసాద్‌'' అని పేర్లు పెడితే మాత్రం కాస్త కష్టమే. అప్పట్లో రామ్ గోపాల్ వర్మ ''శ్రీదేవి''కి హీరోయిన్‌ శ్రీదేవి అబ్జక్షన్ తెలిపిన సంగతి మనం మర్చిపోకమునుపే ఇప్పుడు శ్రీ కిషోర్‌ అనే దర్శకుడు ''దేవిశ్రీప్రసాద్‌'' అనే పేరుతో సినిమా తీస్తున్నట్లు చెబుతూ.. ఒక టీజర్‌ పోష్టర్‌ ను కూడా రిలీజ్ చేశాడు.

''ఇప్పటి వరకు ఎవరూ టచ్ చేయని పాయింట్ తో, ప్రేక్షకులు ఊహించని ట్విస్టులతో కూడిన స‌స్పెన్స్ థ్రిల్ల‌ర్ క‌థాంశంతో ఈ సినిమాను స‌రికొత్త రీతిలో తెర‌కెక్కించేలా శ్రీ కిషోర్ స‌న్నాహాలు చేస్తున్నారు'' అంటూ చేసిన ప్రకటనకంటే.. ఈ సినిమా టైటిలే ఆసక్తికరంగా ఉంది. మరి ఇలా తన పేరుతో సినిమా చేస్తుంటే దేవి ఒప్పుకుంటాడా??