ఒక ‘సాహో’= పది సినిమాలు

‘రన్ రాజా రన్’ అనే ఒకే ఒక్క సినిమా తీసిన అనుభవంతో ‘బాహుబలి’ కథానాయకుడు ప్రభాస్‌ తో సినిమా చేసే సువర్ణావకాశాన్ని అందుకున్నాడు యువ దర్శకుడు సుజీత్. ఇది తనకు లైఫ్ టైం ఛాన్స్ అని.. ఈ సినిమాకు పని చేయడం పది సినిమాలకు పనిచేసిన అనుభవంతో సమానమని అతనంటున్నాడు. ‘సాహో’ గురించి ఒక ప్రముఖ పత్రికతో మాట్లాడుతూ అతనీ వ్యాఖ్యలు చేశాడు.

‘సాహో’ లార్జర్ దన్ లైఫ్ కాన్వాస్ లో తెరకెక్కుతున్న భారీ సినిమా అని.. అందుకే ఒకేసారి పది సినిమాలకు పని చేస్తున్న భావన కలుగుతోందని అతను చెప్పాడు. ప్రస్తుతం తన దృష్టి అంతా ‘సాహో’ మీదే ఉందని.. అందుకే దీని తర్వాత ఏ సినిమా చేయాలనే ఆలోచన కూడా తనకు రావట్లేదని.. ఈ సినిమా తనకు అంత ప్రత్యేకమని అతనన్నాడు. ప్రభాస్ తనకు సోదరుడిలాంటి వాడని.. అతడితో తనకు గొప్ప అనుబంధం ఉందని సుజీత్ చెప్పాడు.

‘రన్ రాజా రన్’ విడుదలయ్యాక సుజీత్ కు వేరే అవకాశాలు వచ్చినప్పటికీ.. ప్రభాస్ తోనే సినిమా చేయాలనే పట్టుదలతో అతను.. రెండేళ్లకు పైగా ఖాళీగా ఉన్నాడు. ప్రభాస్ ‘బాహుబలి’ పూర్తి చేసి ఫ్రీ అయ్యాక అతడితో ‘సాహో’ మొదలుపెట్టాడు. ‘రన్ రాజా రన్’ తీసిన ‘యువి క్రియేషన్స్’ సంస్థే ఈ చిత్రాన్ని కూడా ప్రొడ్యూస్ చేస్తోంది. ఈ చిత్రం రూ.150 కోట్ల బడ్జెట్లో తెరకెక్కుతుండటం విశేషం.