టాలెంటెడ్ డైరెక్టర్ నెక్స్ట్ ప్రాజెక్ట్ పై క్లారిటీ వచ్చేనా..?

2014లో 'రన్ రాజా రన్' సినిమాతో 23 ఏళ్ళ వయసులో దర్శకుడిగా ఇండస్ట్రీకి పరిచయమయ్యాడు సుజీత్ రెడ్డి. అప్పటికే షార్ట్ ఫిలిమ్స్ చేసిన అనుభవంతో, యువ హీరో శర్వానంద్ ని డైరెక్ట్ చేసి మంచి సక్సెస్ సాధించాడు. అంతేకాదు డిఫరెంట్ స్క్రీన్ ప్లే తో రొమాంటిక్ కామెడీ థ్రిల్లర్ ని తెర మీద ఆవిష్కరించిన విధానానికి ప్రేక్షకులు మరియు విమర్శకుల నుంచి ప్రశంసలు అందుకున్నాడు.

ఒక్క సినిమాతోనే యంగ్ రెబల్ స్టార్ ప్రభాస్ దృష్టిని ఆకర్షించాడంటే సుజీత్ టాలెంట్ ఏంటో అర్థం చేసుకోవచ్చు. 'బాహుబలి' చిత్రంతో ప్రపంచ వ్యాప్తంగా గుర్తింపు తెచ్చుకున్న ప్రభాస్.. వెంటనే యంగ్ డైరెక్టర్ తో వర్క్ చేయడానికి గ్రీన్ సిగ్నల్ ఇచ్చారు. అయితే 'బాహుబలి 2' మూవీ అనుకున్న దాని కంటే ఎక్కువ సమయం తీసుకోవడంతో.. సుజీత్ తో చేయాల్సిన సినిమా లేట్ అయింది.

ఈ సమయంలో సుజీత్ మరో సినిమా చేయకుండా.. డార్లింగ్ కోసం దాదాపు నాలుగేళ్ళ పాటు వేచి చేశాడు. చివరకు ప్రభాస్ హీరోగా ''సాహో'' వంటి స్టైలిష్ యాక్షన్ మూవీని తెరకెక్కించాడు. అంతేకాదు పాన్ ఇండియా స్థాయిలో అన్ని ప్రధాన భాషల్లో విడుదల చేసారు. అయితే భారీ అంచనాల నడుమ వచ్చిన ఈ చిత్రం.. ఆశించిన విజయాన్ని అందుకోలేకపోయింది.

కాకపోతే 'సాహో' సినిమా తెలుగులో నిరాశ పరిచినా.. హిందీలో మాత్రం వంద కోట్లకు పైగా వసూళ్లతో సత్తా చాటింది. దీంతో ఇండియా వైడ్ పాపురల్ అయిన డైరక్టర్ సుజిత్.. మూడేళ్లు గడుస్తున్నా ఇంతవరకు తదుపరి చిత్రాన్ని సెట్స్ మీదకు తీసుకెళ్లలేకపోయారు. కనీసం అధికారిక ప్రకటన కూడా చేయలేదు. ఏళ్ళు గడుస్తున్నాయి కానీ.. అసలు టాలెంటెడ్ డైరెక్టర్ నెక్స్ట్ ప్రాజెక్ట్ ఎవరితో ఉంటుందనే దానిపై స్పష్టత లేదు.

నిజానికి మెగాస్టార్ చిరంజీవితో 'లూసిఫర్' సినిమాను రీమేక్ చేసే అవకాశం ముందుగా సుజీత్ కే దక్కింది. కొంతకాలం కథ మీద వర్క్ చేశాడు కూడా. అయితే యువ దర్శకుడు స్క్రిప్ట్ తో మెప్పించకపోవడంతో ఈ ప్రాజెక్ట్ చేతులు మారినట్లు టాక్ ఉంది. ఏదైతేనేం చివరకు అది మోహన్ రాజా దర్శకత్వంలో 'గాడ్ ఫాదర్' చిత్రంగా ప్రేక్షకుల ముందుకు వచ్చిన సంగతి తెలిసిందే.

ఈ నేపథ్యంలో పలువురు హీరోలను సంప్రదించిన సుజీత్.. పవన్ కళ్యాణ్ తో సినిమా చేయడానికి ప్లాన్ చేసుకున్నాడు. ఇప్పటికే యంగ్ డైరెక్టర్ తన స్క్రిప్ట్ తో పవర్ స్టార్ ను మెప్పించారనే రూమర్స్ కూడా వచ్చాయి. ఇందులో నిజమెంతో తెలియదు కానీ.. కొన్ని నెలలుగా పవన్ కథ మీదనే వర్క్ చేస్తున్నాడని అంటున్నారు. కాకపోతే ప్రస్తుత పరిస్థితి చూస్తుంటే సుజిత్ కి మరోసారి ఎదురు చూపులే మిగిలేలా ఉన్నాయి.

రీఎంట్రీ తర్వాత బ్యాక్ టూ బ్యాక్ సినిమాలు సైన్ చేసిన పవన్ కళ్యాణ్.. వివిధ కారణాలతో అనుకున్న విధంగా పూర్తి చేయలేకపోయాడు. ఇప్పుడు రాజకీయాల్లో బిజీ అయిపోవడంతో ఆల్రెడీ కమిటైన చిత్రాల సిచ్యువేషన్ ఏంటనేది అర్థం కావడం లేదు. కాకపోతే ఎన్నికల ముందు క్రిష్ జాగర్లమూడి దర్శకత్వంలో 'హరి హర వీరమల్లు' సినిమా మాత్రమే కంప్లీట్ చేస్తాడనే సూచనలు కనిపిస్తున్నాయి.

ఒకవేళ అదే జరిగి 2024 సార్వత్రిక ఎన్నికల తర్వాత పవన్ డేట్స్ ఇస్తాను అంటే మాత్రం అగ్ర హీరోని నమ్ముకున్న సుజీత్ పాటుగా కొంతమంది దర్శకులు డిజప్పాయింట్ అవ్వాల్సి వస్తుంది. అప్పటి వరకూ వెయిట్ చేయడం అంటే మరికొంత సమయాన్ని వెచ్చించినట్లే అవుతుంది. ఇప్పటికే 8 ఏళ్ళ కెరీర్ లో కేవలం రెండు సినిమాలే డైరెక్ట్ చేసాడు. పవన్ తోనే చేయాలని కూర్చుంటే ఇంకో మూడేళ్లయినా ఖాళీగా ఉండాల్సి వస్తుంది.

ఈ నేపథ్యంలో సుజీత్ ఇప్పుడు బాలీవుడ్ లో సినిమా చేయడానికి ప్రయత్నాలు చేస్తున్నాడనే టాక్ నడుస్తోంది. 'సాహో' చిత్రంతో హిందీ నిర్మాతల దృష్టిలో పడి ఉండటంతో.. ఇప్పుడు వారి ద్వారా అక్కడి స్టార్ హీరోలతో ప్రాజెక్ట్ సెట్ చేసుకునే పనిలో ఉన్నాడట. మరి త్వరలోనే దీనిపై కుర్ర డైరక్టర్ క్లారిటీ ఇస్తాడేమో చూడాలి.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.