ఆన్ లైన్ ఆడిషన్స్ జరుపనున్న స్టార్ డైరెక్టర్!

ఫిల్మ్ డైరెక్టర్స్ అందరూ లాక్ డౌన్ లోనే తమ తదుపరి ప్రాజెక్టులను కూడా షూటింగ్ కోసం రెడీ చేస్తున్నారు. డైరెక్టర్ తేజ ఇపుడు అదే పనిలో ఉన్నాడు. రానాతో 'రాక్షస రాజ్యంలో రావణాసురుడు' సినిమా తర్వాత.. జయం సినిమాతో గోపీచంద్ ను విలన్‌గా పరిచయం చేసిన తేజ.. త్వరలోనే గోపీచంద్ ను హీరోగా డైరెక్ట్ చేయనున్నాడు. ఈ సినిమాకు 'అలిమేలుమంగ వేంకటరమణ' అనే టైటిల్ ఖరారు చేశారు. ఈ ఏడాది చివరలో ఈ సినిమా సెట్స్ పైకి వెళ్తుందని సమాచారం. ఇక ఈ సినిమాలో వేంకటరమణ క్యారెక్టర్‌ను గోపీ చేయనుండగా.. అలిమేలుమంగ పాత్రను ఎవరు చేస్తారనేది ప్రస్తుతం ఇండస్ట్రీలో ఆసక్తి రేపుతోంది. అయితే లక్ష్మీ కళ్యాణం సినిమాతో కాజల్ అగర్వాల్.. జయంతో నితిన్.. చిత్రంతో ఉదయ్ కిరణ్.. జై సినిమాతో నవదీప్ లను ఇండస్ట్రీకి పరిచయం చేసిన తేజ..

ఇప్పుడు “అలివేలుమంగ వెంకటరమణ” సినిమాకి హీరో హీరోయిన్లు కాకుండా మిగతా క్యారెక్టర్స్ కు కొత్తవారిని పరిచయం చేయాలని నిర్ణయించుకున్నాడు. అభిషేక్ అగర్వాల్ ఆర్ట్స్.. పీపుల్ మీడియా ఫ్యాక్టరీ బ్యానర్లలో నిర్మితమవుతున్న ఈ సినిమా కోసం దర్శకుడు తేజ టాలీవుడ్ లో తొలిసారిగా సోషల్ మీడియా ద్వారా లైవ్ ఆడిషన్స్ మొదలు పెడుతున్నాడు. ఆన్ లైన్ ద్వారా నటీనటులను ఎంపిక చేయడానికి ఇటీవలే ప్రకటన ఇచ్చాడు. కేవలం హలో యాప్ ద్వారా అప్లై చేసిన వారితో మాత్రమే తేజ ఆడిషన్స్ జరపనున్నట్లు తెలిపారు. ఆన్ లైన్ ఆడిషన్స్ తో న్యూట్యాలెంట్ ను ఎంకరేజ్ చేయాలనే తేజ ఆలోచనను అభినందించవల్సిందే. మరో విషయం ఏంటంటే.. కొత్తవారైతే పెద్దగా హడావిడి లేకుండా సినిమాను పూర్తి చెయ్యొచ్చని తేజ భావిస్తున్నట్లు సమాచారం. ప్రస్తుతం హీరో గోపీచంద్ సీటిమార్ అనే స్పోర్ట్స్ నేపథ్యంలో సినిమా చేస్తున్న విషయం తెలిసిందే.