తేజకు ఎదురుచూపులు తప్పట్లేదుగా...

దర్శకుడు తేజ కొన్ని నెలలుగా వెయిట్ చేస్తూనే ఉన్నాడు. ఈ వెయిటింగ్ అంతా దేవుడి కోసమే. దేవుడు అంటే భగవంతుడు కాదు లెండి.. భల్లాలదేవుడి కోసం ఎదురుచూస్తున్నాడు తేజ. కొత్త సినిమా స్టార్ట్ చేసేందుకు స్క్రిప్ట్ వగైరాలతో పాటు క్యాస్టింగ్ కూడా కంప్లీట్ చేసేసుకున్నాడీ దర్శకుడు. లీడ్ రోల్ లో నటించేందుకు రానా కూడా ఒప్పుకున్నాడు.

తేజ సినిమాలో నటించేందుకు దగ్గుబాటి రానా యాక్సెప్ట్ చేశాడు కానీ.. ఎప్పుడు షూటింగ్ లో పాల్గొంటాడన్నదే గ్యారంటీ ఉండడం లేదు. మొన్న మొన్నటి వరకూ ఘాజీ.. ఇప్పుడు బాహుబలి ది కంక్లూజన్ షూటింగ్ లలో మునిగిపోయాడు ఆజానుబాహుడు. బాహుబలి2 షూటింగ్ పార్ట్ ఫినిష్ చేశాక కానీ.. రానాను వదిలిపెట్టడు రాజమౌళి. దానికేమో ఇంకా టైమ్ పట్టేట్లుగా ఉంది. అప్పటివరకూ ఎదురుచూడ్డం మినహాయిస్తే.. తేజ చేయగలిగింది ఏమీ ఉండడం లేదు.

రానాకి జోడీగా ఈ మూవీలో హీరోయిన్ గా నటించేందుకు తనే లక్ష్మీ కళ్యాణం ద్వారా లాంఛ్ చేసిన కాజల్ అగర్వాల్ కి చెప్పి ఉంచాడు తేజ. ఆమె కూడా ఓకే చెప్పింది కానీ.. ఇక్కడ సమస్యంతా రానాతోనే వస్తోంది. అలాగని రానా ఏమీ కావాలని తేజను అవాయిడ్ చేయడం లేదు. ప్రెస్టీజియస్ ప్రాజెక్ట్ బాహుబలిని పూర్తి చేసేవరకూ.. వేరే మూవీ వైపు కన్నెత్తి చూడలేని పరిస్థితి. మొత్తం మీద బాహుబలిని రాజమౌళి ఫినిష్ చేస్తేనే.. తేజకు రానా అందుబాటులోకి వస్తాడు. అప్పుడే దేవుడు కరుణిస్తాడు.